Sumir bíða eftir uppsagnarbréfi

Um tvö hundruð foreldrar sem bíða eftir dagvistunarplássi fyrir börnin sín hafa skráð sig í Félagsmiðstöð ungra barna. Stofnandi segir ástandið óboðlegt þar sem margir meðlimir óttast um vinnu sínu eða neyðast til að vera á atvinnuleysisbótum.

Meðlimir hópsins sem var stofnaður um mánaðarmótin á Facebook eru þegar orðnir rúmlega 200 talsins og eiga það allir sameiginlegt að fá ekki dagvistunarpláss fyrir börnin sín.

„Þetta er tliraun til þess að vera ekki alltaf heima með þau börn sem ekki eru komin með pláss hjá dagmömmu eða í leikskóla," segir Kristín Sævarsdóttir, stofnandi hópsins.

Langir biðlistar eru hjá dagforeldrum og í leikskólum borgarinnar. Eitt dagforeldri sem fréttastofa ræddi við segist nánast hætt að taka niður nöfn á biðlista þar sem hann sé orðinn of langur en mörg börnin á honum eru enn ófædd. Ljóst er að vandinn er mjög brýnn en dagforeldrum hefur á síðustu árum fækkað nokkuð í Reykjavík, eða úr 170 fyrir tveimur árum í 135 í fyrra. Stýrihópur um daggæslukerfið á að skila útbótatillögum á næstunni og stendur þá til að ráðast í endurskoðun.

Kristín segir ástandið óboðlegt. „Þetta er mikið púsl fyrir marga foreldra og sumir eru að bíða eftir að fá uppsagnarbréf inn um lúguna. Við höfum þann sveiganleika að geta púslað vinnunni okkar saman en það geta ekkert allir. Sumir þurfa að skrá sig á atvinnuleysisbætur, sem er heldur ekkert rétt, en fólk er bara að reyna redda þessu bili og að brúa það," segir Kristín.

Ein móðir í hópnum sem hefur verið lengi á biðlista segist ekki geta farið út á vinnumarkaðinn. „Ég er bara búin að vera með hann heima og er ekki með vinnu. Maður er því bara enn heima að njóta," segir Helena Auður Guðnadóttir og bætir við að hún gæti ekki haldið vinnu í þessari stöðu.

„Hann er númer 23 í röðinni," segir hún um biðlistann. „En þau sögðu mér að vera vongóð með haustið. Þannig við bara ætlum að vera það," segir  Helena.