Ein og hálf milljón mörgæsa „í felum“

Vísindamenn hafa fundið áður óþekktar mörgæsabyggðir á afskekktum eyjum undan Suðurheimskautslandinu. Uppgötvunin þykir koma nokkuð á óvart.

Mörgæsabyggðin fannst á eyjaklasa sem nefnist Danger Islands. Eru það níu eyjar við nyrsta odda Suðurheimskautsskagans. Eru byggðirnar í þriðja og fjórða sæti yfir fjölmennustu Adelie-mörgæsabyggðum heimsins.

Adelie-mörgæsir eru ein af fimm mörgæsategundum sem finnast á Suðurheimsskautslandi verða þær um 70 sentimetrar að stærð og þrjú til sex kíló að þyngd.

Líkt og áður segir þykir uppgötvunin koma nokkuð á óvart en aðeins 100 kílómetrum vestan við eyjaklassann hefur Adelie-mörgæsum fækkað mjög vegna bráðnunar íss.

Vísindamenn frá Bandaríkjunum, Bretlandi og Frakklandi uppgötvuðu byggðirnar með hjálp gervihnattamynda en afar erfitt er að komast að eyjunum vegna mikils hafíss.

Í fyrstu héldu vísindamennirnir að um mistök væru að ræða en myndirnar gáfu til kynna mikinn fjölda mörgæsa. Eftir vettvangsferð, hausatalningu og nánari skoðun kom hinn mikli fjöldi í ljós.