Fulltrúar Hugarafls vonsviknir með Ásmund Einar

Hugarafl sendi frá sér fréttatilkynningu í dag um vonbrigði sín með fund fulltrúa Hugarafls með Ásmundi Einari Daðasyni félagsmálaráðherra þann 27. febrúar síðastliðinn.

„Ljóst var strax í upphafi fundar að ráðherra hafði ekki gefið sér tíma í að kynna sér málefni GET og Hugarafls og mikill tími fór því í að kynna starfsemina sem fram fer í Borgartúni 22.  Eftir kynninguna tjáði ráðherra fulltrúum Hugarafls að félagsmálaráðuneytið teldi það ekki í sínum verkahring að koma að málinu og vísað til baka á heilbrigðisráðherra.“

Segja talsmenn samtakanna að það sé ljóst að þegar Svandís Svavarsdóttir heilbrigðisráðherra hafi sagt í pontu á Alþingi að vel væri búið um framtíð Hugarafls af hálfu félagsmálaráðuneytisins, hafi verið orðin tóm.

„Svör félagsmálaráðherra voru skýr um að ekkert fjármagn væri að koma frá ráðuneyti félagsmála til að tryggja starfsemi Hugarafls eftir 1. september.  Það er því allt útlit fyrir að styrkir frá félagsmálaráðuneyti skerðist til Hugarafls um 2.5 milljónir árið 2018, í stað þess að bætt sé í þegar mest á reynir.  Og tveggja ára samningur upp á 17 milljónir við Vinnumálastofnun dugar skammt til að sinna þeim mikla fjölda notenda sem leitar til okkar í Borgartúnið,“ segir í tilkynningunni.

Geta ekki beðið mikið lengur

Telur Hugarafl að innan ráðuneyta velferðarmála sé ekki skilningur á alvarlegri stöðu notenda GET og Hugarafls eða stöðu öflugra grasrótarsamtaka sem barist hafa fyrir réttindum og bættri þjónustu fyrir fólk með geðræna erfiðleika til margra ára. 

„Skilaboð fulltrúa Hugarafls til félagsmálaráðherra voru skýr um að samtökin gætu ekki beðið miklu lengur meðan ráðherrar velferðarmála henda notendum geðheilbrigðiskerfisins og grasrótarsamtaka á milli sín.  Allra síst þegar þeir sömu ráðherrar eiga að vera að tryggja að unnið sé eftir nýjum verkferlum geðheilbrigðisáætlunar byggða á samþættingu og samfellu milli þessara tveggja kerfa. Miklir annmarkar blasa nú þegar við á framkvæmd geðheilbrigðisáætlunar sem augljóslega bitna á gæðum geðheilbrigðisþjónstu á Íslandi.  Við erum bókstaflega að tala um að fólk með geðræna erfiðleika er skilið eftir á götunni í skjóli nýrrar geðheilbrigðisáætlunar og það er talið eðlilegt af hálfu stjórnsýslu og ráðherra velferðarmála.“

Kemur fram í tilkynningunni að Hugarafl og GET finni fyrir miklum stuðningi í samfélaginu. Hugarafl er starfrækt fyrir alla þá sem hafa upplifað geðræna erfiðleika og aðstandendur þeirra. Þar er einstaklingnum veittur stuðningur við að ná bata og stjórn á eigin lífi með einstaklingsmiðaðari nálgun. Sérstaða Hugarafls er persónuleg nálgun, samstarf fagfólks og notenda geðheilbrigðisþjónustunnar á jafningjagrunni.