Veitur í gáma vegna myglu

Skipulags- og umhverfisráð Akraness samþykkti á fundi sínum í vikunni að veita Veitum ohf. tímabundið byggingarleyfi til að koma fyrir sjö 20 feta gámum á lóð núverandi húsnæðis fyrirtækisins.

Um er að ræða skrifstofugáma sem hýsa skrifstofu, kaffi- og snyrtiaðstöðu starfsmanna vegna myglu sem fannst í húsnæði Veitna.

Grunsemdir um myglu vöknuðu síðastliðið haust og var húsnæðið rýmt. Veitur ohf. er dótturfélag Orkuveitu Reykjavíkur en mygla og rakaskemmdir hafa leikið höfuðstöðvar fyrirtækisins í Reykjavík grátt.