Meirihluta starfsmanna United Silicon sagt upp

Uppsagnir blasa við meirihluta starfsmanna kísilverksmiðju United Silicon í Helguvík. Starfsfólki var tilkynnt um þetta á fundi á fjórða tímanum í dag.

Andstæðingar stóriðju í Helguvík vilja blása til íbúakosninga um framtíð svæðisins, en forsvarsmenn Arion banka vona að starfsemin geti haldið áfram.

United Silicon var úrskurðað gjaldþrota í Héraðsdómi Reykjaness í gær og markaði það endalok þrautagöngu fyrirtækisins. Ljóst er að fjölmargir munu tapa miklum fjármunum á gjaldþrotinu, en þeirra á meðal er Reykjanesbær – en fjárhagsstaða bæjarins er erfið fyrir.

„Það var og er gert ráð fyrir tekjum af skipaumferð um Helgavíkurhöfn, meðal annars út af þessari verksmiðju. Við þurfum að fara að endurskoða þær áætlanir núna,“ segir Kjartan Már Kjartansson, bæjarstjóri í Reykjanesbæ.

Líklega er óhætt að segja að Helguvík hafi undanfarin ár verið svæði stöðugra vonbrigða. Þar stendur nú grind álvers sem aldrei varð og hinum megin við götuna er umtalaðasta verksmiðja síðustu ára, United Silicon, sem nú er gjaldþrota.

Hvílir bölvun á þessu svæði?

„Ég ætla nú ekki að segja að það hvíli bölvun á svæðinu, en það er alveg rétt að menn hafa verið með alls konar hugmyndir og lagt af stað í alls konar verkefni sem gengu ekki eftir,“ segir Kjartan.

Kjartan vonast til þess að hægt verði að koma verksmiðjunni í starfhæfan búning sem fyrst, þannig að starfsemi geti hafist á ný. Á öndverðum meiði eru hins vegar samtökin Andstæðingar stóriðju í Helguvík, en þeir mynda m.a. fjölmennan fésbókarhóp.

Ánægjulegt að félagið sé gjaldþrota

Þórólfur Júlían Dagsson, talsmaður samtakanna, segir fréttir af gjaldþrotinu ánægjulegar.

„Samt er mjög leiðinlegt að störf tapist þarna, en þetta er ekki framtíðarstarfsemi fyrir svæðið,“ segir Þórólfur.

Þórólfur telur rétt að leggja málið í hendur íbúa á svæðinu.

„Ég myndi vilja halda binandi íbúakosningu um framhaldið. Þá væri þetta mál bara útkljáð fyrir fullt og allt og þyrfti ekkert að ræða það meir.“

Alltént er ljóst að starfsemi hefst ekki í bráð, enda hefur Umhverfisstofnun sett ströng skilyrði um úrbætur áður en ræsa má verksmiðjuna á ný.

Starfsmenn verksmiðjunnar eru á sjötta tug, en nú liggur fyrir að meirihluti þeirra mun fá uppsagnarbréf í hendur á næstu dögum. Níu starfsmenn munu halda vinnunni fyrst um sinn, en skiptastjórinn Geir Gestsson segir störf þeirra miða að því að gæta þess að verksmiðjan skemmist ekki meðan engin starfsemi fer fram. Kristján Gunnarsson, formaður verkalýðs- og sjómannafélags Keflavíkur, segir þungt hljóð í starfsmönnum – en málið fari nú í hefðbundið ferli.

„Við þurfum að lýsa fyrir þá kröfum á vangoldnum launum eða þeim launum sem kunna að vera í uppsagnarfresti,“ segir Kristján.

Arion banki er stærsti hluthafi og lánveitandi United Silicon. Forsvarsmenn bankans vildu ekki veita viðtal vegna málsins í dag. Í samtali við fréttastofu sagði Haraldur Guðni Eiðsson, forstöðumaður samskiptasviðs, hins vegar ljóst að bankinn myndi óska eftir því að ganga að veðum sínum hjá fyrirtækinu.

Þá sé stefnt að því að koma verksmiðjunni í sölu- og starfhæft form, en það gæti þó tekið á annað ár. Haraldur segir að 7-8 aðilar hafi sýnt kaupum á eignunum áhuga, en gangi það ekki eftir muni bankinn hugsanlega freista þess að koma verksmiðjunni sjálfur í rekstur.