Fá ekki túlkaþjónustu þegar þær skilja við eiginmenn sína

Konur af erlendum uppruna rufu þögnina í gær og stigu fram með MeToo sögur af fordómum, útilokun, áreitni, mansali, vanrækslu og kynferðisofbeldi. Þessar sláandi frásagnir vöktu mikla athygli og bíða konurnar nú eftir viðbrögðum frá stjórnvöldum og stéttarfélögum.

Þær Nicole Leigh Mosty kennari, verkefnastjóri og fyrrverandi þingmaður og Sabine Leskopf varaborgarfulltrúi voru í viðtali í Harmageddon í dag og ræddu þar umræðuhóp kvenna af erlendum uppruna.



Innflytjendur er mannauður

„Ég held að það sé rosalega mikilvægt að gera sér grein fyrir að þessi mismunun er margþætt,“ segir Sabine. Hún hefur unnið í þessum málum frá árinu 2004 og verið í stjórn Samtaka kvenna af erlendum uppruna, vann í Alþjóðahúsi, situr nú í stjórn Kvennaathvarfsins og er í borgarstjórn. Sagði hún í samtali við Vísi að þrátt fyrir að fyrstu og annar kynslóðir innflytjenda séu 13 prósent íbúa hér á landi, séu meira en helmingur kvennanna í Kvennaathvarfinu af erlendum uppruna.

„Það hefur alltaf verið mín lína að berjast svolítið á tveimur vígvöllum. Þessi hópur er til, sem verður fyrir grófu ofbeldi og svona en ég vil líka berjast fyrir því að við höfum rödd, að fólk geri sér grein fyrir að innflytjendur séu mannauður, að það geti verið þakklátt fyrir að fá okkur hingað,“ sagði Sabine í Harmageddon. „Það er það sem Vigdís Finnbogadóttir kenndi okkur, kenndi litlum stelpum að þær geti verið allt sem þær vilja.“

Benti hún á að börn, ekki bara þau sem eru innflytjendur, sjái konur af erlendum uppruna oftast ekki í sjónvarpinu, í valdastöðum og stjórnunarstöðum heldur að skúra í skólanum.

Fá ekki túlk þegar þær skilja við eiginmanninn

Sabine gagnrýnir að Sýslumaður telji sig geta sinnt sinni upplýsingaskyldu þó að fólk skilji ekki orð af því sem kemur fram.

„Þeir panta ekki túlk þannig að kona sem kemur í skilnaðarviðtal hjá Sýslumanni er algjörlega háð makanum sem hún er að skilja við. Þær eru margar, ég veit um nokkur dæmi þar sem kona hefur afsalað sér forræði yfir börnunum sínum af því að þær skildu ekki hvað fer þarna fram.“

Nicole sé að þetta sé víðar, eins og hjá Barnaverndarnefnd. Hún hafi einu sinni fengið símtal frá grátandi konu í neyð vegna tungumálaerfiðleika.

„Börnin hennar voru tekin af henni og hún vissi ekki nákvæmlega af hverju.“

Hver ber ábyrgð?

„Hver ber ábyrgð á þessum sögum sem eru hér? Alls ekki þessar konur, alls ekki,“ sagði Nicole um reynslusögur kvennanna. Hún sagði að hugrekki þeirra til að stíga fram með sínar sögur væri ákall eftir aðgerðum.

„Ég bíð eftir að heyra viðbrögð frá til dæmis Ragnari hjá VR, Gylfa hjá ASÍ. Hvað ætla þau að gera á vinnumarkaðinum? Hvernig ætla þau að efla þekkingu á réttindum fólk sem er að starfa hjá þeim. [...] Halldór Benjamín í SA. Bara gjörðu svo vel, ég vil sjá ykkur í fjölmiðlum.“

Konurnar eru með framkvæmdaáætlun með aðgerðum tengdum opinberum stofnunum, sveitarfélögum og þeirra ábyrgð til þess að fræða, mennta og skýra leiðir fyrir innflytjendur.

„Það er á okkar ábyrgð að valdefla hverja einustu manneskju sem er hér. Hvern einasta skattborgara.“



Viðtalið við Nicole og Sabine í Harmageddon má hlusta á í heild sinni í spilaranum hér að neðan.