Mikilvægt að rjúfa einangrun kvenna af erlendum uppruna

Það mátti greina rauðan þráð í frásögnum kvenna af erlendum uppruna sem í síðustu viku stigu fram með frásagnir af kynferðislegri áreitni og ofbeldi en þær virtust margar hverjar búa við mikla einangrun. Það er aðkallandi verkefni að rjúfa einangrun kvennanna.

Þetta kom í máli Guðfinnu J. Guðmundsdóttur, borgarfulltrúa Framsóknarflokksins, sem var á meðal gesta Kristjáns Kristjánssonar í þjóðmálaþættinum Sprengisandi. Nicole Leigh Mosty, verkefnisstjóri og fyrrverandi Alþingiskona og Heiða Björg Hilmisdóttir, borgarfulltrúi ræddu einnig um viðkvæma stöðu sem konur af erlendum uppruna búa við á Íslandi.

Sveitarfélög og vinnumarkaður taki höndum saman

„Ef einangrunin er það mikil þá er auðvitað erfitt fyrir þessa einstaklinga að leita sér aðstoðar af því þeir þekkja ekki hvernig hlutirnir eru og hafa jafnvel engan til að leita til. Þeir þekkja jafnvel engan annan en ofbeldismanninn sem viðkomandi býr með,“ segir Guðfinna sem telur að öll sveitarfélög ásamt vinnumarkaðinum eigi að taka höndum saman til tryggja það að konur af erlendum uppruna viti að þær geti verið öruggar á Íslandi og viti hvert þær geti leitað ef eitthvað kemur upp á. Það sé allt og algengt að þær þekki ekki reglurnar í íslensku þjóðfélagi.

Nicole, sem sat á Alþingi fyrir Bjarta framtíð, er ein talskvenna „Me Too“ byltingarinnar.

„Ég var kannski ekki áreitt af karlmönnum en mér var haldið niðri bæði sem kona og útlensk kona sem fékk ekki sama traust og tækifæri og aðrir. Þú getur ímyndað þér að upplifa það í ræstingum. Það er eitt að upplifa það í þingkona að upplifa þetta en hvað með að vera í ræstingum?“ segir Nicole sem setur sig í spor verkakvenna af erlendum uppruna. Hún brýnir fyrir íslensku þjóðinni að varast það að fara í vörn. „Þetta er samfélagslegt vandamál og við megum ekki fara í vörn. Það er kannski það mikilvægasta. Við þurfum að þora að taka þetta samtal og finna leið upp úr þessu og efla þessar konur.“

Í yfirlýsingu segir að frásagnir kvenna af erlendum uppruna séu ofnar úr fordómum, mismunun, markvissu niðurbroti, vanrækslu, útilokun og misnotkun. Sjá frétt Vísis hér.

Frásagnirnar afhjúpa kerfisbundið valdamisvægi

Heiða Björg, tekur undir með Nicole, sem segir að við þurfum að vinna með frásagnirnar og draga lærdóm af þeim. „Ég get ekki sagt að þessar frásagnir kæmu mér á óvart, ég þurfti alveg að herða mig upp til að lesa þær því ég þóttist vita hvað stæði þarna.“ Frásagnirnar séu vitnisburður um kerfisbundið valdamisvægi í íslensku samfélagi.

„Þessir fordómar okkar gagnvart fólki með annan uppruna kemur mjög berlega fram. Við höfum séð það í mansalsmálum og ýmsu sem við höfum verið að eiga við hér í Reykjavík. Við þurfum að taka okkur á,“ segir Heiða.

Heiða, sem hefur gegnt formennsku í Ofbeldisvarnarnefnd, segir að fólk eigi ekki að tala niður það sem þó sé til staðar og bjóðist konum af erlendum uppruna. Það sé mikilvægt að reyna að koma í veg fyrir að þær verði fyrir ofbeldi og að koma í veg fyrir það að þær þurfi yfir höfuð að leita sér aðstoðar.

Markmiðið er að fólk nái að fóta sig

„Hver einasta manneskja sem nær að fóta sig er sigur samfélagsins. Þetta á alltaf að vera okkar markmið í öllu sem við gerum í þeirri þjónustu sem við veitum og í þeim kerfum sem við höfum eins og hjá lögreglunni, dómskerfinu, velferðarkerfinu, menntakerfinu og heilbrigðiskerfinu. Efla, efla, efla,“ segir Nicole.

Í spilaranum hér að neðan er hægt að hlusta á viðtalið í heild sinni.