Ragnar ekki fengið laun og gæti farið frá Rubin Kazan

Ragnar Sigurðsson hefur rétt eins og aðrir leikmenn rússneska liðsins Rubin Kazan hefur ekki fengið laun síðustu fjóra mánuðina en þetta staðfesti hann í viðtali við Hjört Hjartarson í Akraborginni á X-inu 977.

Ragnar er hjá Rubin Kazan sem lánsamaður hjá Fulham en samingur hans við enska félagið rennur út í lok sumars.

„Ég held að það sé mjög ólíklegt að ég fari aftur til Fulham. Mér gekk ekki vel þar og ef sami þjálfari verður áfram þá vil ég ekki fara þangað, né heldur vill hann fá mig,“ sagði Ragnar.

„En að því sögðu þá veit maður aldrei hvað gerist í fótboltanum og hlutirnir geta breyst mjög hratt.“

Rubin Kazan hefur ekki verið að greiða leikmönnum laun síðustu mánuðina eins og áður hefur verið greint frá og staðfesti Ragnar að það væri tilfellið.

Sjá einnig: Var hátt uppi eftir EM

„Þeir vilja losna við leikmenn sem eru á allt of háum launum. Ég er ekki einn af þeim,“ sagði Ragnar enn fremur en hann telur að það búi meira að baki en bara fjárhagsvandræði.

„Þetta gæti tengst eitthvað bakhjörlum og fleira slíkt en ég veit lítið um þau mál.“

Ragnar segir að það sé vissulega pirrandi að fá ekki launin sín og að það hafi sést á frammistöðu liðsins síðustu vikur og mánuði. „Þeir hafa svo sem ekki mikinn skilning fyrir þessu, þjálfararnir, að það gangi illa. Það er bara hraunað yfir okkur og enginn skilur neitt í neinu.“

„Sem betur fer er maður ekki alveg nautheimskur. Maður hefur sparað pening og er því ekki að svelta í hel. En maður á auðvitað að fá borgað á réttum tíma.“

Ragnar hefur þó ekki miklar áhyggjur af stöðunni, enda hjá Rubin Kazan sem lánsmaður. „Ég á bara tíu leiki eftir og svo taka aðrir spennandi hlutir við. En það er alltaf óþægilegt að búa við óvissu eins og þessa. En ég held að þetta sé verra fyrir marga aðra en mig.“

Hann telur best að fara í annað lið í janúar. „Ég held að Rubin-menn séu opnir fyrir því og við erum að vinna í þessu með umboðsmanni mínum. Ég held að það væri besta lausnin,“ sagði Ragnar í Akraborginni.