Vilja kvenskörunga í stjórn

Skiptar skoðanir eru meðal þingmanna um óformlegar þreifingar milli Sjálfstæðisflokks, Vinstri grænna og Framsóknarflokks um myndun ríkisstjórnar.

Það yrðu vonbrigði beiti Katrín Jakobsdóttir, formaður Vinstri grænna, sér ekki fyrir því að öflugustu kvenskörungar þingsins verði í forystu enda hafi hún nefnt jafnréttismálin sérstaklega þegar henni var veitt umboð til stjórnarmyndunar í síðustu viku. Þetta er mat þingmanna sem hugnast best stjórn frá vinstri til miðju. Auk Katrínar sjálfrar nefna þessir þingmenn Lilju Alfreðsdóttur, Þórhildi Sunnu Ævarsdóttur, Þorgerði Katrínu Gunnarsdóttur og Helgu Völu Helgadóttur.

Logi Einarsson, formaður Samfylkingarinnar hefur lýst því yfir að ekki sé enn fullreynt að mynda stjórn frá vinstri til miðju. Hann hefur rætt bæði við Katrínu og Sigurð Inga eftir að upp úr viðræðum slitnaði og ræðir við aðra forystumenn í dag. Þetta herma heimildir blaðsins. Ekkert talsamband mun hins vegar vera milli formanna Sjálfstæðisflokks og Samfylkingar.

Samkvæmt heimildum Fréttablaðsins mun Katrín leiða formlegar viðræður Sjálfstæðisflokks, Vinstri grænna og Framsóknarflokks ef af þeim verður, gegn því að þingstyrkur Sjálfstæðisflokksins endurspeglist með öðrum hætti í stjórninni. Náist samkomulag milli forystumanna flokkana um þessi atriði, verða málin rædd í þingflokkum. Það ræðst í kjölfar þeirra hvort Katrín getur farið á fund forseta með meirihluta til formlegra viðræðna.

Þeir þingmenn VG sem náðist í í gær segjast bera fullt traust til Katrínar til að leiða viðræður. Í kosningabaráttunni hafi flokkurinn ekki útilokað samstarf við neinn og samstarfið þurfi að ráðast af málefnum.

Sjálfstæðismenn sem Fréttablaðið hefur rætt við segja öll möguleg stjórnarmynstur erfið og í rauninni engan kost sérstaklega góðan. Það þurfi að koma í ljós hvort þessir flokkar sem nú ræðast óformlega við geti komið sér saman um málefnin og það geti orðið flókið. Hins vegar þurfi sú stjórn sem mynduð verður að endurspegla niðurstöðu kosninganna og þá staðreynd að Sjálfstæðisflokkurinn er langstærsti flokkurinn. Gefi flokkurinn frá sér forsætisráðuneytið þurfi stjórnin að endurspegla ólíka stærð flokkanna með öðrum hætti.

Einn viðmælenda blaðsins hafði á orði að stjórn mynduð af þessum flokkum sem aldrei hafi starfað saman í ríkisstjórn áður, gæti þrátt fyrir allt orðið upphaf sögulegra sátta stjórnmálanna í landinu eftir áratug af ólgu og miklum átökum.