Segist hafa bitið tungu eiginmannsins óvart og ekki skilið eigin styrk

Hæstiréttur hefur staðfest farbannsúrskurð Héraðsdóms Reykjavíkur gagnvart konu sem grunuð er um að hafa bitið tunguna af eiginmanni sínum. Konan segir að hún hafi óvart bitið í tungu mannsins.

Líkamsárásin átti sér stað aðfaranótt miðvikudags í heimahúsi í Reykjavík. Lögregla var kölluð á vettvang og voru mikil læti á staðnum þegar hana bar að garði.

Í greinargerð lögreglu segir að konan hafi reiðst þegar eiginmaður hennar hafi verið að gera sér dælt við aðra konu á staðnum. Hafi þau í kjölfarið farið að rífast. Við yfirheyrslu sagði konan að eiginmaðurinn hefði verið mikið í andlitinu á sér.

Kvaðst hún hafa bitið hann óvart en „kvaðst svo ekki hafa skilið þann styrk sem hún hafi í tönnunum þegar hún hafi birtið í tunguna á honum,“ að því er segir í skýrslunni.

Sauma þurfti þrjátíu spor til þess að sauma tungu mannsins saman á ný en ekki er víst hvort að ú aðgerð hafi heppnast. Það mun koma í ljós síðar.

Konan er frá Ástralíu og er í farbanni til 29. nóvember næstkomandi.