Kosningaáróður Sjálfstæðismanna á kjörstað kærður

Sýslumanninum á Suðurnesjum hefur borist kæra vegna þess sem kærandi, sem er framkvæmdastjóri Framsóknarflokksins, metur sem ótvíræðan kosningaáróður á kjörstað.

Um er að ræða áberandi kosningaskilti Sjálfstæðismanna á húsakynnum útibús sýslumannsins á Suðurnesjum í Grindavík. Sýslumaðurinn og lögreglan eru til húsa að Víkurbraut 25 í Grindavík. En, á Víkurbraut 27 er svo rekið félagsheimili Sjálfstæðisfélaganna. Samkvæmt upplýsingum Vísis hafa kosningaskrifstofur verið í þessu sama húsi áður.

Framkvæmdastjóri Framsóknarflokksins hefur sent sýslumanni kröfu um að stöðva þegar í stað kosningu utan kjörfundar í Grindavík „vegna óleyfilegs kosningaáróðurs og kosningaspjalla. Enda óleyfilegt að reyna að hafa áhrif á atkvæðagreiðslu með að hafa uppi merki stjórnmálasamtaka í húsakynnum þar sem kosning fer fram,“ segir í kærunni sem Vísir hefur undir höndum.

Ásdís Ármannsdóttir sýslumaður segir í samtali við Vísi að þar á bæ sé verið að skoða málið af fullri alvöru. En, hún geti ekki tjáð sig nánar um það á þessu stigi. Hún á meðal annars eftir að ræða við ráðuneytið og yfirkjörstjórn.

Innan Framsóknarflokksins er menn þeirrar meiningar að þetta hljóti að þýða að utankjörfundaratkvæðagreiðslan það sem af er verði að teljast ólögleg.