Reynir að varpa ljósi á samband hversdagslegrar áreitni og launamunar kynjanna

Drífa Snædal, framkvæmdastjóri Starfsgreinasambands Íslands, reynir að varpa ljósi á samband hversdagslegrar áreitni, sem konur búa við, og launamunar kynjanna í stöðuuppfærslu á Facebooksíðu sinni. Í viðtali við Vísi segir Drífa að kynferðisleg áreitni á vinnustað grafa undan sjálfsmynd kvenna.

Í stöðuuppfærslunni á Facebook segir Drífa meðal annars:

„Ég efast ekki um að það að verða fyrir ofbeldi hafi áhrif á sjálfsmat kvenna þegar kemur að launakröfum. Alveg á sama hátt og karlar sem beita ofbeldi meta konur alveg örugglega ekki til sömu launa og karla.“

Allt hefur þetta áhrif hvert á annað

Í samtali við Vísi gerir Drífa grein fyrir mikilvægi þess að horfa til þátta eins og launamun kynjanna í samhengi við alla áhrifaþætti. 

„Mér finnst rosalega mikilvægt að vera ekki alltaf að skoða launamuninn annars vegar og áreitni hins vegar, möguleika kvenna til framgangs í atvinnulífinu og svo framvegis af því allt hefur þetta áhrif hvert á annað.“

Drífa segir kynferðislega áreitni á vinnustað grafa undan sjálfsmynd kvenna.

„Ef áreitni er fyrsta reynsla kvenna á vinnumarkaði þá hlýtur það að lita stöðu þeirra á vinnumarkaði: þær eru líklegri til að hætta og síður líklegri til að sækja framgang. Þær eru bara settar í undirskipaða stöðu á vinnumarkaði,“ segir Drífa sem segir áreitnina hafa hamlandi áhrif á konur hvort sem um ræðir að sækja framgang eða sækja um launahækkanir.

Þá tekur Drífa mið af hinni hliðinni og veltir því fyrir sér hvort þeir yfirmenn sem hafi í frammi kynferðislega áreitni meti þær konur sem jafningja þegar komi að launaákvörðunum.

„Fyrir mér er ekki hægt að slíta þetta úr samhengi. Baráttan gegn kynferðislegri áreitni á vinnustöðum er ekki bara barátta fyrir öryggi starfsfólks heldur líka barátta um jafnrétti í launum.“

Samþykktu áætlun gegn kynferðislegri áreitni og ofbeldi

Í síðasta mánuði samþykkti Starfsgreinasambandið áætlun gegn kynferðislegri áreitni og ofbeldi, bæði sem vinnustaður og félagasamtök.

„Af því að við náttúrulega erum með mjög mikið af svona stórum ráðstefnum og fundum og svona þar sem við verðum að geta tryggt öryggi fólks og verðum að vera með áætlun ef eitthvað bregður út af og ekki síður til þess að hvetja okkar aðildarfélög til þess að setja sér sams konar áætlanir,“ segir Drífa.

Drífa telur að frásagnir kvenna í rafrænu „Ég líka“ byltingunni hjálpi til í þessari baráttu.

„Ég held að það hafi gerst alveg rosalega margt á síðustu tuttugu til fjörutíu árum. Fyrir fjörutíu árum síðan þá bara þögðu konur og þetta var talið eitthvað sem væri bara eðlilegur hluti af því að vera á vinnumarkaði nánast, í ákveðnum störfum, sérstaklega í þjónustustörfum.“

Fréttin hefur verið uppfærð.