Rúnar tekur aftur við KR-liðinu

Rúnar Kristinsson er aftur orðinn þjálfari KR í Pepsi-deild karla í fótbolta en hann var kynntur sem nýr þjálfari liðsins á blaðamannafundi í Frostaskjóli í dag.

KR-ingar eru þar með að endurheimta einn sinn allra farsælasta þjálfara en Rúnar fær það stóra verkefni að koma KR-ingum út úr þeirri niðursveiflu sem þeir hafa verið í undanfarin ár.  Rúnar gerði þriggja ára samning við KR.

Rúnar tekur við starfi Willums Þórs Þórssonar sem hefur stýrt Vesturbæjarliðinu í eitt og hálft ár. Willum Þór hætti þjálfun liðsins á dögunum þar sem hann ætlaði að einbeita sér að störfum fyrir Framsóknarflokkinn en framundan eru kosningar seinna í þessum mánuði.

Rúnar hefur þjálfaði norska félagið Lilleström og belgíska félagið Lokeren síðan að hann hætti með KR-liðið eftir 2014 tímabilið. Hann var látinn fara á báðum stöðum og er nú kominn aftur heim til Íslands þar sem hann gerði frábæra hluti með KR fyrir nokkrum árum.

Rúnar var með KR-liðið frá 2010 til 2014 á þessum tíma vann liðið fimm titla, tvo Íslandsmeistaratitla (2011 og 2013) og þrjá bikarmeistaratitla (2011, 2012 og 2014). KR vann titil síðustu fjögur tímabilin sem Rúnar var með liðið.

Rúnar var á sínum tíma leikmaður KR en hann lék 140 leiki með liðinu í efstu deild frá 1987 til 1994 og svo 2007.  Hann er eini leikmaðurinn sem hefur náð því að spila hundrað landsleiki fyrir Ísland.

KR endaði í fjórða sæti Pepsi-deildar karla á síðasta tímabili og missti af Evrópukeppninni. Sumarið 2018 verður fyrsta sumarið frá 2008 þar sem KR-ingar eru ekki í Evrópukeppni.

Rúnar Kristinsson semur til 3 ára við KR #allirsemeinnpic.twitter.com/1F5m14eqqw

— KR Reykjavik FC (@KRreykjavik) October 3, 2017