Öfl í kringum Kaupfélag Skagfirðinga sögð hafa unnið hart gegn Gunnari Braga

Gunnar Bragi Sveinsson einn helsti forystumaður Framsóknarflokksins hefur hætt við framboð sitt til forystu í flokknum í Norðvesturkjördæmi og sagt sig úr flokknum. Heimildarmenn innan flokksins segja kaupfélagsstjórann á Sauðárkróki hafa róið að því öllum árum að bola Gunnari Braga úr forsytusæti listans.

Kaupfélagsstjórinn hafi beitt sér gegn Gunnari Braga

Samkvæmt heimildum fréttastofu hefur Þórólfur Gíslason kaupfélagsstjóri Kaupfélags Skagfirðinga og fjölmargt áhrifafólk í Framsóknarflokknum sem tengist Kaupfélaginu og ýmist situr þar í stjórn eða hefur setið þar í stjórn, beitt sér ljóst og leynt gegn Gunnari Braga Sveinssyni oddvita flokksins í kjördæminu.

Til stendur að kjósa um fimm efstu sæti á lista framsóknarmanna á tvöföldu kjördæmaþingi hinn 8. október og í þeim slag eru Ásmundur Einar Daðason fyrrverandi þingmaður og Stefán Vagn Stefánsson sagðir kaupfélagsstjóranum mjög þóknanlegir.

Andstöðu Þórólfs kaupfélagsstjóra við Gunnar Braga má meðal annars rekja til þess að hann lét ekki undan þrýstingi frá kaupfélagsstjóranum og öðrum innan Samtaka fyrirtækja í sjávarútvegi um að Ísland skæri sig úr hópi NATO og EES ríkja og styddi ekki refsiaðgerðir gegn Rússum, sem settu á móti innflutningsbann á íslenskar sjávarafurðir.

Kom ekki á óvart að Gunnar Bragi hafi hætt við framboð

Þorleifur Karl Eggertsson formaður kjördæmisráðs Framsóknarflokksins í Norðvesturkjördæmi segir það ekki hafa komið á óvart að Gunnar Bragi hætti við framboð. Hann hafi verið að hugsa málin og hann virði hans ákvörðun. Hann kannist ekki við að unnið hafi verið skipulega gegn Gunnari Braga.

Er kaupfélagsstjórinn að skipta sér mikið af málum innan flokksins?

„Nei, ekkert meira en aðrir held ég.“

Þannig að þú vilt ekki meina að hann sé að stjórna málum á bakvið tjöldin?

„Nei nei, ég hef ekki orðið var við það.“

Varstu var við að aðilar innan Framsóknarflokksins í kjördæminu væru beinlínis að vinna gegn Gunnari Braga?

„Er það ekki bara þannig að þegar menn vilja komast í framboð að þá þurfa þeir að vinna gegn einhverjum. Ég hef ekkert orðið persónulega var við það. En auðvitað verða þeir varir við það sem eru í slagnum,“ segir Þorleifur Karl.

Gunnar Bragi hefur ekki rætt við fjölmiðla í dag en á Facebook síðu sinni segir hann:

„Nú er svo komið að hreinlyndið er á undanhaldi í flokknum mínum. Einhver annarleg öfl virðast hafa tekið forystu í flokknum, öfl sem ég hef líklega ekki verið nógu undirgefinn. Kafbátahernaður er stundaður. “

 „Verst þykir mér að þessi óheilindi eru leidd af fólki í trúnaðarstöðum fyrir flokkinn í minni heimabyggð og einstaklingum sem telja sig eiga að ráða framvindu mála.“

„Þegar ég rita þetta þá sit ég með hnút í maganum enda ekki létt að hverfa á braut. Eflaust gæti ég unnið forsystusætið en hvað er unnið með því ef samstarfið verður óbærilegt? Er heiðarlegt að bjóða sig fram vitandi að allar líkur eru á að maður myndi hrökklast úr þingflokknum?“

„Eftir að hafa ráðfært mig við fjölskyldu og vini hef ég ákveðið að draga framboð mitt til baka. Ég hef jafnframt ákveðið að segja mig úr Framsóknarflokknum."

„Hvað ég geri nú er ekki ljóst en ég mun ákveða það næstu daga,” segir Gunnar Bragi meðal annars á Facebook síðu sinni í dag.