Gústi Gylfa: Búinn að bíða eftir þessu

Ágúst Þór Gylfason, þjálfari Fjölnis, var að vonum sáttur með 3-1 sigur sinna manna á Víkingi Reykjavík í Pepsi deild karla í dag.

„Þetta var kærkomið, kominn tími á að fá þrjú stig. Erum búnir að spila síðustu fjóra leiki og fá eitt stig og ekki búnir að vera sáttir með okkar spilamennsku. En við gerðum vel í dag og fengum þrjú stig sem er kærkomið í þessari baráttu sem við erum að fara í,“ sagði Ágúst eftir leikinn.

„Mikil barátta og við áttum nokkur góð færi í leiknum en það voru móment sem Víkingarnir höfðu líka, þeir hefðu getað komist vel inn í leikinn, en það var barátta í liðinu og við gerum mjög vel í flestum þessum mörkum sem við skorum.“

Sjá einnig: Umfjöllun, viðtöl og einkunnir: Fjölnir 3 - 1 Víkingur R. | Mikilvægur sigur Fjölnis

„Frábær frammistaða hjá liðinu, ég var búinn að bíða eftir þessu. Frábær sigur,“ sagði Ágúst.

Ágúst gerði tvöfalda skiptingu á 70. mínútu og setur Birni Snæ Ingason og Ægir Jarl Jónasson inn, og má segja að sú skipting hafi ráðið úrslitum leiksins því Birnir Snær kom Fjölnismönnum yfir og fiskaði svo aukaspyrnuna sem síðasta markið kom úr.

„Við setum tvo mjög spræka stráka inn og þeir breyta aðeins leiknum. Þetta var meðvitað, við ætluðum að fá þessa stráka inn á og þeir voru munurinn í dag. Þeir börðust mjög vel og gerðu það að verkum að við sigruðum hér í dag,“ sagði Ágúst.

Bæði lið fengu vítaspyrnu í fyrri hálfleik og hafði Ágúst ekkert út á það að setja. „Ég held það hafi bæði verið víti, klárlega.“