Færðu Pepsi-deildar leik kvenna á sama tíma og undanúrslit EM kvenna

Fyrsti leikur Pepsi-deildar kvenna í fótbolta eftir EM-frí fer fram á Grindavíkurvelli í kvöld.

Pepsi-deildin átti að vera í fríi þar til eftir Verslunarmannahelgi en einn leikur var færður fram vegna þátttöku Stjörnunnar í forkeppni Meistaradeildar kvenna.

Leikur Grindavíkur og Stjörnunnar átti fara fram 19. ágúst klukkan 14.00 á Grindavíkurvelli en fer nú fram í kvöld klukkan 19.15 á Grindavíkurvelli.

Ástæða breytingarinnar er að síðar í ágúst tekur Stjarnan þátt í forkeppni Meistaradeildar kvenna. Forkeppnin verður leikin í tíu fjögurra liða riðlum og munu sigurvegararnir fara í lokakeppni mótsins auk þess liðs sem nær bestum árangri í öðru sæti riðlakeppninnar.

Riðill Stjörnunnar verður leikinn í Króatíu 22.til 28. ágúst en auk Stjörnunnar eru í riðlinum ŽNK Osijek frá Króatíu, Klaksvík Ítrottarfelag frá Færeyjum og  ŽFK SC Istatov frá Makedóníu.

Athygli vekur þó að leikurinn er settur á sama tíma og leikur í undanúrslitum EM kvenna í fótbolta. Undanúrslitaleikur Hollands og Englands hefst klukkan 18.45 í kvöld að íslenskum tíma.

Það hefur ekki verið vinsælt að fara með leikinn nær Verslunarmannahelginni og því þurfa stelpurnar og stuðningsfólk liðanna að fórna öðrum undanúrslitaleiknum á EM. Þau ná hinsvegar fyrri undanúrslitaleik Danmerkur og Austurríkis sem hefst klukkan 16.00.

Stjarnan getur minnkað forskot Þór/KA á toppi Pepsi-deildar kvenna í þrjú stig með sigri í Grindavík í kvöld.