Komin heim eftir að mannræningjar reyndu að selja hana á uppboði

Bresk fyrirsæta, sem rænt var í Mílanó á Ítalíu og haldið í gíslingu í sex daga, er komin aftur heim til sín. BBC greinir frá.

Hin tvítuga Chloe Ayling var stödd í Mílanó vegna myndatöku. Lögregluyfirvöld á Ítalíu segja tvo menn hafa ráðist á hana þann 11. júlí síðastliðinn, byrlað henni ólyfjan og rænt henni. Mennirnir eru taldir hafa ætlað að selja Ayling á uppboði á netinu fyrir 230 þúsund pund eða um 31,5 milljónir íslenskra króna.

Ayling var handjárnuð við kommóðu í svefnherbergi húss í bænum Borgial skammt frá Tórínó. Þar dúsaði hún í sex daga þar til henni var sleppt. Hún sagðist allan tímann hafa óttast um líf sitt og lýsti prísundinni sem „hryllilegri lífsreynslu.“

Pólskur ríkisborgari, Lukasz Herba, sem búsettur er í Bretlandi hefur verið handtekinn grunaður um að hafa rænt Ayling. Lögregluyfirvöld á Ítalíu, Póllandi og Bretlandi fara nú með rannsókn málsins.