Var kominn með mikinn leiða

Kristján Þór Einarsson vann Einvígið á Nesinu, árlegt góðgerðarmót Nesklúbbsins og DHL Express á Íslandi, í gær. Mótið hefur farið fram á Nesvellinum á Frídegi verslunarmanna frá árinu 1997. Þetta er í annað sinn sem Kristján vinnur Einvígið á Nesinu en hann afrekaði það einnig 2014.

Alls tóku 11 kylfingar þátt í ár. Um morguninn var að venju leikinn níu holu höggleikur en eftir hádegið hófst sjálft Einvígið þar sem einn keppandi datt út á hverri holu þangað til tveir börðumst um sigurinn á 9. holu. Á endanum stóðu þeir Kristján og Guðmundur Rúnar Hallgrímsson eftir og hafði sá fyrrnefndi betur.

„Þetta var góður og mjög skemmtilegur dagur,“ sagði Kristján í samtali við Fréttablaðið í gær.

„Ég var að spila rosalega vel í Einvíginu sjálfu. Um morguninn var maður bara að fá tilfinningu fyrir vellinum. Það er alltaf gaman að spila á þessu móti,“ bætti kylfingurinn úr Mosfellsbænum við.

Kristján hefur verið í fremstu röð íslenskra kylfinga á undanförnum árum og varð m.a. Íslandsmeistari 2008. Hann segir þó að áhuginn á golfinu sé ekki alveg sá sami og hann var áður.

„Rétt fyrir Íslandsmótið var ég farinn að finna að ég var kominn með rosalega mikinn leiða á golfinu og naut mín ekki á vellinum,“ sagði Kristján.

„Maður tók eiginlega þátt vegna þess að maður þurfti þess. En það var önnur stemning í dag [gær]. Maður fór til að hafa gaman og þegar maður hefur gaman af þessu verður golfið betra.“

En var Kristján jafnvel farinn að hugsa um að leggja kylfuna á hilluna?

„Nei, ekki alveg. En kannski ekki að taka þetta af jafn mikilli hörku. Ég vil frekar hafa gaman af þessu og geta farið í golf og leikið mér í staðinn fyrir að fara í golf og tilfinningin sé eins og það sé verið að pína mann í það,“ sagði Kristján sem vonast til að sigurinn í Einvíginu á Nesinu gefi honum spark í rassinn fyrir Íslandsmót golfklúbba um næstu helgi.

Eins og áður sagði er Einvígið á Nesinu góðgerðarmót. Að þessu sinni fékk Vinaliðaverkefnið, sem leggur áherslu á að stöðva einelti í skólum, eina milljón króna frá DHL á Íslandi.