Valdís Þóra Íslandsmeistari í þriðja sinn

Valdís Þóra Jónsdóttir, kylfingur úr GL, er Íslandsmeistari í höggleik í kvennaflokki í þriðja sinn á ferlinum eftir æsispennandi lokahring þar sem hún hafði betur gegn heimakonunni Guðrúnu Brá Björgvinsdóttur úr GK.

Er þetta í þriðja skiptið sem Valdís verður Íslandsmeistari í höggleik og í fyrsta sinn í fimm ár eftir að hafa lent í öðru og þriðja sæti undanfarin þrjú ár.

Fór mótið fram á golfvelli Golfklúbbsins Keilis á þessu ári í tilefni fimmtíu ára afmæli klúbbsins en þetta er í þriðja skiptið sem mótið fer fram á þessum velli.

Var mikil spenna fyrir lokahringinn hjá konunum þar sem Valdís, Guðrún og Ragnhildur Kristinsdóttir úr GR voru allar jafnar á átta höggum yfir pari eftir þrjá hringi.

Valdís átti í erfiðleikum framan af þegar vindurinn blés hressilega í Hvaleyrinni og fékk hún fjóra skolla á fyrstu fimm holunum en Guðrún Brá sem tapaði ekki höggi á fyrstu þremur holunum fékk síðar þrjá skolla í röð og var einvígi þeirra því hnífjafnt.

Þrefaldur skolli og skrambi hjá Ragnhildi þýddi að hún missti af þeim snemma dags og varð þetta því tveggja manna einvígi og voru þær jafnar á ellefu höggum yfir pari eftir níu holur.

Veðuraðstæður skánuðu töluvert á seinni níu holunum og varð golfið betra um leið. Tapaði Valdís aðeins einu höggi á átta fyrstu holunum og fékk tvo fugla gegn þremur skollum og tveimur fuglum frá Guðrúnu.

Gekk Valdís langt með að innsigla sigurinn er hún setti innáhöggið á sautjándu meter frá holu en þegar hún renndi því niður var hún komin með tveggja högga forskot þegar aðeins ein hola var eftir. Gat hún leyft sér að vera afslöppuð á átjándu og par hennar þar gulltryggði endanlega sigurinn.