Sara: Kannski var hausinn farinn

Sara Björk Gunnarsdóttir, landsliðsfyrirliði, var eðlilega mjög svekkt eftir tapleikinn gegn Austurríki í kvöld en sporin eftir leik voru ansi þung.

Íslenska liðið var á eftir því austurríska í öllum aðgerðum í kvöld og tapaði, 3-0. Þrátt fyrir að hafa að engu að keppa voru stelpurnar okkar stressaðar frá fyrstu mínútu.

„Þær spiluðu leikinn alveg eins og við vorum búnar að tala um og alveg eins og Heimir var búinn að greina og Freysi var búinn að segja okkur frá,“ sagði Sara Björk eftir leik.

„Ég er ósátt við hvernig við byrjuðum þetta. Við hefðum getað verið rólegri á boltanum og fundið aðeins fleiri og betri stundir til að halda í boltann. Við náðum stundum fínu spili en það er margt sem við þurfum að bæta.“

Þurfum að bæta okkur

Lagt var upp með að vera besta varnarliðið á mótinu en það fékk á sig sex mörk í þremur leikjum; eitt mark í þeim fyrsta, tvö í leik tvö og svo þrjú í kvöld.

„Við vildum ekki fá nein mörk á okkur. Við ætluðum að vera besta varnarliðið en það eru nokkur atriði sem við þurfum að bæta í varnarleiknum. Við þurfum að skerpa á einbeitingu inn í teig. Við eigum að vera ótrúlega sterkar í föstum leikatriðum og eigum ekki að fá mörk á okkur úr þeim. Við þurfum að bæta okkur sem lið.“

Ísland komst á EM með stæl en það pakkaði saman sínum riðli í undankeppninni og var hársbreidd frá því að klára hana með fullt hús stiga. Freyr landsliðsþjálfari hefur mikið vitnað til undankeppninnar og hversu gott liðið var þar en er liðið þá slakara núna?

„Við erum ekki slakara lið en við spiluðum undankeppnina mjög vel. Undankeppni er nú samt aðeins annað en stórmót. Við vorum með meira sjálfstraust og meiri yfirvegun í undankeppninni. Þetta mót fer bara í reynslubankann. Það er margt sem við þurfum að bæta. Við þurfum að líta inn á við og sjá hvað við getum bætt fyrir liðið,“ sagði Sara.

Léleg æfing

Fyrirliðinn spilar eins og meirihluti austurríska liðsins í þýsku 1. deildinni. Sást bersýnilega í kvöld hversu mikið íslenska liðið vantar að vera með fleiri leikmenn í bestu deildum Evrópu?

„Þetta er gott og skipulagt lið. Kannski var einhver smá gæðamunur. Gæðin eru samt alveg til staðar hjá okkur. Við þurfum bara að þora að gera meira til að nýta okkar styrkleika,“ sagði Sara.

Freyr talaði um það í viðtali við íþróttadeild að æfing gærdagsins hefði verið mjög léleg og augljóst að leikmenn voru ekki komnir yfir vonbrigðin að vera á leið heim sama hvernig færi í kvöld.

„Æfingin var mjög léleg. Við vorum ekki einbeittar og hausinn var kannski farinn. Mér fannst við samt staðráðnar í að vera einbeittar í leiknum. Við komum vel stemmdar í leikinn því við vorum búnar að ákveða það að klára þetta mót með stæl og sérstaklega með sigri. Kannski var hausinn aðeins farinn. Við gerðum okkar besta í dag en þegar horft er til baka er margt sem þarf að bæta,“ sagði Sara Björk Gunnarsdóttir.