Teigurinn: Fylkir og Keflavík verða að fara upp

Það er mikil spenna í Inkasso-deildinni í fótbolta.

Í gær mættust tvö efstu lið deildarinnar, Fylkir og Keflavík, suður með sjó og fóru leikar 3-3.

Fylkismenn eru því áfram með tveggja stiga forskot á Keflavík á toppi deildarinnar. Þróttur er í 3. sætinu, einu stigi á undan Keflavík, og Þór, sem hefur unnið hvern leikinn á fætur öðrum að undanförnu, er í 4. sætinu, þremur stigum á eftir Keflavík.

„Þetta er hörkubarátta þarna uppi. Í upphafi móts bjóst maður ekki við Þórsurunum þarna. Núna eru þeir bara leik frá 2. sætinu,“ sagði Sigurbjörn Hreiðarsson, aðstoðarþjálfari Vals, í Teignum sem var á dagskrá á Stöð 2 Sport HD í kvöld.

Reynir Leósson er á því að Fylkir og Keflavík séu með sterkustu liðin í Inkasso-deildinni.

„Þessi tvö lið verða að fara upp. Ég held að það muni sjá á þeim ef þau fara ekki upp. Þau verða að komast upp núna. Það er mikil pressa þarna,“ sagði Reynir.

„Öll liðin í efstu þremur sætunum ætla sér upp. Allt annað eru ævintýraleg vonbrigði,“ bætti Sigurbjörn við.

Innslagið í heild sinni má sjá í spilaranum hér að ofan.