Áætlun Íslands í krabbameinsmálum til 2020: Endurskoða biðtíma sjúklinga og hækka skatta á óhollum vörum

Búið er að birta skýrslu ráðgjafarhóps Heilbrigðisráðuneytisins þar sem farið er yfir áætlun Íslands í krabbameinsmálum. Áætlunin gildir til ársins 2020. Guðbjartur Hannesson, fyrrverandi velferðarráðherra, stóð að baki tillögunni og hefur Óttarr Proppé, núverandi heilbrigðisráðherra, tekið við keflinu. Þetta kemur fram inn á vef Stjórnarráðsins.

Í skýrslunni er fjallað um krabbamein út frá mörgum mismunandi þáttum. Meðal þess sem kemur fram í samantekt skýrslunnar er að lögð verði áhersla á forvarnir og einstaklingsbundið mat.

Lagt er til að lög um réttindi sjúklinga verði endurskoðuð og samræmt sjúkraskrárkerfi verið tekið í notkun á öllum sviðum til að auka upplýsingaflæði. Í árangursviðmiðum, sem er að finna í hverjum kafla fyrir sig, er meðal annars rætt um að biðtími sjúklinga verði ásættanlegur þannig að hann verði að hámarki 20 virkir dagar frá upphafi til enda greiningarferlis sem og að hafin verði hópleit á ristils- og endaþarmskrabbameini á þessu ári.  Fræðsla um HPV veiruna og húðkrabbamein verður einnig aukin og þátttaka í skimunum efld.

Endurskoða krabbameinslyf og auka fjármagn

Framboð nýrra krabbameinslyfja verður einnig skoðað og haft að markmiði að Ísland standist sömu kröfur hvað lyf varðar og samanburðarlönd. Einnig segir að úthluta þurfi fjármagni í fjárlögum til rannsókna á krabbameini í íslensku samfélagi.

Hluti af áætluninni felur í sér tillögu um að lækka skatta af hollum vörum og hækka skatta á óhollum vörum. Tekjurnar af sköttum óhollra vara renna til eflingu aðgerða um heilbrigða lífshætti. Einnig verður gerð opinber aðgerðaráætlun í tóbaks, áfengis- og vímuvörnum þar sem verði verður stýrt og gjald lagt á sem rennur til Lýðheilsusjóðs.

„Við stöndum á krossgötum líkt og ráðgjafarhópurinn bendir á þar sem hækkandi aldur þjóðarinnar og fjölgun íbúa veldur því að á næstu árum mun einstaklingum sem greinast með krabbamein fjölga mikið. Krabbamein er þungbær sjúkdómur bæði þeim sem greinast og aðstandendum þeirra og gerir jafnframt miklar kröfur til heilbrigðiskerfisins. Vinna ráðgjafarhópsins sem birtist í meðfylgjandi skýrslu er í þessu ljósi afar mikilvægur grundvöllur fyrir okkur að byggja á ákvarðanir um aðgerðir til lengri og skemmri tíma litið, hvort sem er á sviði forvarna, meðferðar eða annarra þátta“ segir Óttarr Proppé heilbrigðisráðherra.

Lýðheilsuáætlun þjóðarinnar

Ísland er nú komið í hóp annarra Norðurlandaþjóða sem gert hafa svipaðar tillögur í sínu heimalandi sem byggði á leiðbeiningum Alþjóðaheilbrigðismálastofnunarinnar frá árinu 2002.

Þar er byggt á að tillögur sem þessar séu lýðheilsuáætlun þjóðar eða ríkis sem gera eigi það að verkum að nýjum greiningum á krabbameini fækki og dregið verði úr dánartíðni vegna krabbameina ásamt því að bæta lífsgæði einstaklinga með krabbamein. Lögð verður áhersla á snemmgreiningar, forvarnir og meðferðir. Allt sé þetta gert með jafnræði að leiðarljósi.

Búið er að fela verkefnisstjórn að fylgja tillögunni eftir og forgangsraða verkefnum miðað við fjárheimildir. Óskað er eftir tilnefningum í verkefnisstjórnina.