Stjörnukonur áfram í stuði en enduðu 10 á móti 11

Stjarnan minnkaði forskot Þór/KA á toppi Pepsi-deildar kvenna í tvö stig í kvöld eftir 3-1 sigur á FH í Kaplakrika. Öll mörkin komu í fyrri hálfleiknum.

Katrín Ásbjörnsdóttir, markahæsti leikmaður Pepsi-deildar kvenna, skoraði tvö mörk í leiknum í kvöld og er þar með kominn með átta mörk í sumar. Hún hefur skorað í öllum sex leikjum Stjörnuliðsins síðan að hún tók fyrir fyrirliðabandinu.

Stjörnukonur hafa þar með skorað 18 mörk í fyrstu sex leikjum sínum eða 3,0 mörk að meðaltali og það þrátt fyrir að markadrottning liðsins, Harpa Þorsteinsdóttir, sér enn í barnseignarfríi. Stjörnuliðið hefur nú unnið þrjá síðustu leiki sína með markatölunni 10-3.

Katrín Ásbjörnsdóttir kom Stjörnunni í 1-0 á 29. mínútu með skalla af stuttu færi en Caroline Murray jafnaði fyrir FH aðeins tveimur mínútum síðar eftir sendingu frá Helena Ósk Hálfdánardóttur.

Það var allt að gerast á þessum mínútum því Donnu Key Henry fiskaði víti á 33. mínútu og Katrín Ásbjörnsdóttir kom Stjörnunni aftur yfir.

Staðan varð síðan orðin 3-1 á 41. mínútu þegar Donna Key Henry skoraði eftir stungusendingu frá Öglu Maríu Albertsdóttur.

Stjörnukonur enduðu leikinn tíu á móti ellefu eftir að Ana Victoria Cate fékk beint rautt spjald á 81. mínútu. Cate verður því í leikbanni í toppslagnum á móti Þór/KA á mánudagskvöldið.

FH-liðið vann þrjá leiki í röð í upphafi móts og hafði ekki byrjað betur í fjóra áratugi en Hafnarfjarðarliðið hefur nú tapað tveimur síðustu leikjum sínum ÍBV og Stjörnunni.

Upplýsingar um markaskor og gang leiksins eru fengnar frá fótbolti.net.