Uppnám í Útsvari: Fá ekki að skiptast á gjöfum í beinni útsendingu

Lið Fjarðarbyggðar og Akraness mætast í úrslitaþætti spurningakeppninnar Útsvars í Sjónvarpinu í kvöld en stuðningsaðilar og aðstandendur liðanna er sagði verulega ósáttir við þá ákvörðun RÚV að banna keppendum að skiptast á gjöfum í beinni útsendingu.

Greint er frá þessu ósætti á vef Austurfréttar en hefð er fyrir því að keppendur í Útsvari skiptist á gjöfum og nái þannig að auglýsa ýmsan varning og þjónustu úr sínu héraði.

Haft er eftir upplýsingafulltrúa Fjarðarbyggðar, Birgi Jónssyni, að liðin hafi fengið fyrirmæli um þetta frá RÚV á þriðjudag en hann vill meina að þau hafi borist of seint því Fjarðarbyggð hefði verið búin að lofa fyrirtækjum að taka þátt í því að skiptast á gjöfum.

Austurfrétt hefur eftir Birgi að bæði Fjarðarbyggð og Akranes hafi sent RÚV athugasemdir vegna þessa fyrirkomulags í úrslitunum í kvöld.

Svörin frá RÚV hafi verið á þá vegu að keppendur geti skipst á gjöfum að útsendingu lokinni. Birgir segir jafnframt að einn aðili sem ætlaði að veita varning til að gefa í úrslitunum í kvöld hafi dregið sig úr hópnum hjá Fjarðarbyggð og margir íhugi það hjá Akranesi.

Í frétt Austurfréttar er bent á að gagnrýni á þetta fyrirkomulag RÚV, að banna keppendur að skiptast á gjöfum, sé á þann veg að RÚV selji útvarpsauglýsingar til fyrirtækja í sveitarfélögunum í aðdraganda þáttarins. Sveitarfélögin leggi metnað í að halda vel utan um lið sin og finna öfluga keppendur sem fá ekki greiðslur frá RÚV fyrir þátttöku aðrar en útlagðan kostnað, skili þeir reikningum. Keppendur séu þeir sem dragi áhorfendur að einum vinsælasta þætti Ríkissjónvarpsins og hafi gjafirnar verið ein helsta umbunin fyrir þátttöku í Útsvari.

Haft er eftir Helga Jóhannessyni, útsendingarstjóra hjá RÚV, að vegna verðlaunaafhendingar í úrslitaþættinum, þar sem Útsvarsmeistarinn í ár verður krýndur, sé ekki tími til að skiptast á gjöfum í beinni útsendingu.