Vill setja reglur um tilvísanir

Landspítalinn hefur enga yfirsýn yfir það hvort og þá í hvaða mæli sérfræðilæknar á LSH vísi sjúklingum til sín eða tengdra aðila á einkastofum úti í bæ. Landlæknir segir mjög mikilvægt að settar verði skýrar reglur um vinnubrögð sérfræðilækna.

Rúmur helmingur sérfræðilækna á LSH vinnur einnig á einkastofum úti í bæ og því gætu myndast hagsmunaárekstrar um hvort sjúklingar fari á einkastofur eða á opinbera stofnun vegna meina sinna. Landspítali hefur ekki sett sérfræðingum á stofnuninni reglur hvað þetta varðar. Oft er um að ræða eftirfylgd sem krefst þeirrar sérhæfingar sem aðeins tilteknir læknar hafa og sinna innan og utan LSH.

Ekki hefur verið tekin afstaða til þess innan LSH hvort eigi að setja reglur um vísan sjúklinga frá stofnuninni á einkasjúkrahús. Landspítalinn vinnur nú að því markmiði að sem flestir sérfræðilæknar vinni einvörðungu á spítalanum og þurfi ekki að auka við laun sín með einkapraxís úti í bæ. „Á Landspítala gildir sú regla að fyrsta endurkoma eftir innlögn á spítalann á að vera á göngudeild hans. Þá má benda á að Landspítali vinnur nú að innleiðingu nýrrar stefnu hvað varðar nýráðningar sérfræðinga, þar sem stefnt er að því að almennt sé um fullar stöður að ræða,“ segir í svari LSH.

Birgir Jakobsson landlæknir segir mikilvægt að reglur um þessi mál séu til. Strangar reglur séu við lýði í nágrannalöndum okkar á meðan litlar sem engar reglur séu um þessi mál hér á landi. „Ég, eins og aðrir, heyri að þetta sé að gerast. Hins vegar á að setja strangar reglur um þetta. Reglur í Svíþjóð eru mjög einfaldar, þar sem ég þekki vel til. Þar er ekki leyfilegt að vísa sjúklingum á sjálfan sig,“ segir Birgir.

„Í nágrannalöndum sumum er sérfræðingum á spítala meinað að vinna aukastörf, meira að segja í frítíma þeirra. Í Svíþjóð máttu ekki hafa aukastarf í samkeppni við ríkið, ekki skaða traust þitt og nota aukastarfið til að hagnast og það má ekki hindra þig í þínu aðalstarfi,“ bætir landlæknir við.