Sjaldan fleiri beðið eftir áfengismeðferð

Yfir 300 manns eru á biðlista eftir því að komast í áfengismeðferð. Þórarinn Tyrfingsson, framkvæmdastjóri SÁÁ, segir þetta vera það mesta sem þekkist til margra ára.

„Þetta þýðir að það getur verið alveg 150 daga bið. En svo getur komið læknisfræðilegt mat um að það þurfi að flýta innlögn,“ segir hann. Fólk í bráðasta vandanum sé ekki látið bíða.

Þórarinn segir tvær mögulegar skýringar vera á þessum mikla fjölda. „Það er ekki aukning á vandanum, heldur hafa þeir sem eru í mikilli neyslu verið að eldast,“ segir Þórarinn og bætir við að það auki þörfina á þjónustu frá SÁÁ. „Svo verður að segjast eins og er að Landspítalinn var áður með miklu meira umfang og þjónustu fyrir þennan hóp en hann er með í dag.“

Þjónustan hafi verið mun meiri þegar Landspítalinn var með pláss á Gunnarsholti, í Víðinesi, á Vífilsstöðum og miklu meiri göngudeildarstarfsemi en nú er. Hann segir ríkið velta vandanum yfir á þau úrræði sem Reykjavíkurborg býður upp á og þá SÁÁ.

Þórarinn segir lengri biðlista ekki skýrast af aukinni neyslu. „Síðasta verulega aukning á vandanum var á árunum 1995-2002. Þá var aukning á neyslu og miklu fleiri ungir að leita til okkar. Þetta er stabílt núna en eldra fólk og veikara er að leita til okkar,“ segir hann.

Opinberir aðilar, sveitarfélög og ríki, borga 60 prósent af starfsemi SÁÁ og SÁÁ borgar 40 prósent. Þórarinn telur að skjóta þurfi sterkari stoðum undir reksturinn. SÁÁ geti ekki gert neitt til að vinna á biðlistanum í núverandi aðstæðum „Við erum í mikilli þörf fyrir það að menn líti til þessa málaflokks og axli ábyrgð á því að þetta er ekki á ábyrgð grasrótarsamtaka. Þetta er á ábyrgð alls þjóðfélagsins, sveitarfélaga og ríkisins, og þeim ber að styðja betur við þá starfsemi sem SÁÁ er að reka,“ segir hann.