Guðmundur Hagalín til HS Orku

Guðmundur Hagalín Guðmundsson hefur verið ráðinn sem sérfræðingur í tækniþjónustu HS Orku.

Guðmundur er fæddur 13. febrúar 1954 og er rafmagnsverkfræðingur og vélfræðingur að mennt. Hann mun koma að starfi staðartæknifræðings við byggingu Brúarvirkjunar, 10 MW vatnsaflsvirkjunar í Biskupstungum. Auk þess mun hann koma að öðrum vatnsaflsverkefnum á vegum fyrirtækisins.

Guðmundur hefur víðtæka reynslu af virkjanarekstri, bæði á sviði jarðvarma og vatnsafls. Hann hefur meðal annars starfað hjá Landsvirkjun og Orkuveitu Reykjavíkur. Hann starfaði einnig hjá HS Orku sem rekstrarstjóri orkuvera frá janúar 2011 til september 2011. Síðastliðin ár hefur hann starfað sem forstöðumaður virkjanareksturs hjá Orku Náttúrunnar.

„Við fögnum Guðmundi í okkar sterka lið starfsmanna og með honum bætist við gríðarleg þekking á sviði vatnsaflsvirkjana, sem mun verða vaxandi þáttur í þróun okkar og starfsemi í framtíðinni,“ er haft eftir Ásgeiri Margeirssyni, forstjóra HS Orku í tilkynningu.