Tesla lækkar verð á Model S 75 um 5.000 dollara

Þegar Tesla lækkar verð á sínum bílum er það gert án upphrópana, heldur sjást lækkanirnar einungis á heimasíðu Tesla. Fyrir skömmu lækkaði einmitt Tesla verð um 5.000 dollara á ódýrustu gerð Model S bílsins, sem er með 75 kwh rafhlöðu. Hann kostar nú 69.500 og lækkaði úr 74.500 dollurum.

Því má nú fá þennan lúxusbíl á 7,7 milljónir króna og er í leiðinni ódýrasta gerð hans eftir að tesla hætti að bjóða Model S með 60 kWh rafhlöðu. Tesla lækkaði í leiðinni verð á Model S 75D og 90D og kostar hinn síðarnefndi nú 87.500 dollara. Auk lækkunarinnar hefur Tesla bætt við búnaði í Model S 75 bílinn sem ekki var að finna í eldri gerð hans.

Það eru þó ekki bara verðlækkanir í kortunum hjá Tesla því fyrirtækið mun hækka verðið á næstunni á bæði Model S og Model X bílunum með 100 kWh rafhlöður og mun Model S 100D kosta 97.500 dollara og hækka um 2.500 dollara, en Model X bíllinn hækkar um 1.000 dollara. Model X P100D mun hinsvegar hækka meira, eða úr 135.500 í 145.000 dollara.

Ef til vill eru þessar vrðbreytingar hjá Tesla til að bregðast við minni eftirspurn eftir þeim bílum Tesla sem eru með aflminni rafhlöðurnar, en flestir kaupendur kjósa sér frekar þá bíla sem eru með aflmeiri rafhlöðum og í því ljósi hætti Tesla t.d. framleiðslu Model S 60 bílsins sem var með minnstu rafhlöðunni.