Mikilvægt að gera þetta hægt og rólega

Fyrsta íbúð Hrefnu Rósu Sætran var langt frá því að vera draumaíbúðin hennar, en í dag stendur hún í framkvæmdum í draumahúsinu í Skerjafirði. Hún hefur haft gaman af því að spara frá því hún var barn og leggur mánaðarlega inn á framtíðarreikninga fyrir börnin sín. Hún ætlar sér að vera mörg ár til viðbótar að dúlla við draumahúsið sitt.

„Fyrir svona sex árum síðan keypti ég neðri hæðina í húsi hér í Litla Skerjafirði. Þetta er einbýlishús sem var búið að skipta í tvær íbúðir og það var kona sem bjó á efri hæðinni.  Íbúðin kostaði sama og blokkaríbúð,“ segir Hrefna Rósa.

„Draumurinn var að búa til mitt draumahús og vinna í því og ekki gera þetta á einni nóttu. Mér finnst skemmtilegt að vaxa með húsinu.“

Hrefna Rósa hefur alltaf reynt að leggja fyrir og er með sparnaðarreikning. „Mér finnst gaman að safna inn á bankabók, finnst gaman að sjá tölurnar vaxa, bara frá því ég var barn.“

Kom heim í fyrstu íbúðina til að sofa

„Fyrsta íbúðin sem ég keypti mér ein var alls ekki draumaíbúðin mín, hún var mjög langt frá því,“ segir Hrefna Rósa. „Ég var að opna Fiskmarkaðinn, fyrsta veitingastaðinn minn og hugsaði með mér: ég er ekki að fara að vera í þessari íbúð. Ég rétt kom og svaf þar þannig að hún var bara svona kassi.“

Þegar kom að því að kaupa íbúðina þurfti Hrefna Rósa að fara í greiðslumat og til að geta haft það eins hátt og hægt var, vann hún alla daga í nokkra mánuði. „Ég ætlaði að reyna að bústa upp launaseðilinn og var að læra að vera kokkur, ekkert rosalega spennandi launin þá. Þannig ég ákvað að taka uppvask á móti þannig að ég var 15 daga í eldhúsinu og 15 daga sem uppvaskari. Ég gerði þetta í nokkra mánuði og fór með þetta í bankann og fékk þannig hærra greiðslumat.“

Stendur loksins í framkvæmdum

„Þannig að þetta hefur ekki alltaf verið dans á rósum,“ segir Hrefna Rósa. „Og það er ekki í hverjum mánuði sem maður hefur eitthvað til að leggja fyrir. Ef maður fær aukaverkefni eða  dettur auka peningur inn þá er fínt að spara hann.“

Í dag sex árum seinna á Hrefna Rósa allt húsið og er í svaka framkvæmdum. „Ég er samt búin að safna ágætri fjárhæð til að standa í þessu. Mér finnst mjög mikilvægt að gera þetta hægt og rólega og mér finnst betra að eiga fyrir hlutunum, ég vil ekki demba mér í skuldir.“

Leggur inn á sparnaðarreikninga fyrir börnin

„Ég á tvo börn, fjögurra ára stelpu og fimm ára strák,“ segir Hrefna Rósa. „Ég stofnaði sparireikning fyrir þau og legg alltaf inn 5000 kr. á mánuði. Þann pening langar mig að gefa þeim þegar þau verða eldri. Ég finn ekki sérstaklega fyrir þessu, en í dag er þetta orðin svolítið stór upphæð.

Húsið á að vera tilbúið í sumar og þá vill Hrefna Rósa að það sé bara tilbúið þannig að hægt sé að búa í því. „Ég ætla svo  að vera mörg ár í viðbót að dúlla við það.“



Þetta var saga Hrefnu Rósu, hvernig viltu að þín saga verði? Pantaðu ráðgjöf og komdu til okkar og gerðu þitt plan.



Greinin er kostuð af Íslandsbanka en hún er hluti af Það er hægt, verkefni bankans um fyrstu kaup á fasteign.