Man. City ætlar ekki að kaupa Alli

Pep Guardiola, stjóri Man. City, hefur sagt kollega sínum hjá Tottenham, Mauricio Pochettino, að slaka á. Hann ætli sér ekki að kaupa Dele Alli frá Spurs.

Pochettino tók ekki vel í það er fyrrum miðjumaður Barcelona, Xavi, sagði að Alli væri akkúrat maðurinn sem Pep myndi vilja fá til City.

Pocchettino sagði þá að svona hegðun hjá Xavi væri óþolandi. Hann bætti um betur og sagði að Xavi hataði hann.

Hinn ungi Alli hefur átt frábært tímabil með Tottenham þar sem hann hefur skorað 20 mörk í öllum keppnum.

„Mauricio Pochettino þarf að halda ró sinni. Dele Alli verður hans leikmaður næsta vetur. Ég er nokkuð öruggur um það. Við viljum ekki fá Dele Alli. Hann er frábær leikmaður og frábært fyrir enskan fótbolta hvað honum hefur gengið vel. Hann er einn sá besti sem ég hef séð koma hlaupandi inn í teiginn,“ sagði Pep.