Hænur leyfðar en ekki hanar

Íbúar í Kópavogi mega halda hænsn og geta þeir sótt um leyfi fyrir allt að sex hænum, samkvæmt nýrri samþykkt um hænsnahald.

Meðal skilyrða fyrir leyfisveitingu er að fyrir liggi samþykkt sameigenda ef um er að ræða fjölbýlishús. Þá þarf samþykki aðliggjandi lóða ef um einbýlishús eða raðhús eða parhús er að ræða. Óheimilt er að halda hana samkvæmt samþykktinni.

Sett eru skilyrði um stærð hænsnakofa, og skal kofi fyrir sex hænur vera að lágmarki 3 fermetrar. Í reglugerðinni kemur fram að til að koma í veg fyrir ónæði ber að hafa myrkur hjá hænsnunum frá klukkan 21 til 7 alla daga.

Fréttin birtist fyrst í Fréttablaðinu