Tekinn fullur í Borgarnesi og kærastan flúði úr bílnum í Leirársveit

Íslendingurinn, sem sætir rannsókn bandarísku lögreglunnar í Austin í Texas vegna gruns um að hafa beitt kærustu sína ofbeldi á hóteli í borginni, var handtekinn í Borgarnesi síðastliðna helgi vegna gruns um ölvun við akstur.

Nokkrum mínútum síðar þurfti konan að keyra út í kant vegna ofbeldis mannsins í bílnum en hann sat í aftursæti bílsins, lét ófriðlega og reif reglulega í hana þar sem hún var við akstur. Ökumaður annarrar bifreiðar kom konunni til aðstoðar.

Konunni var ekið á bráðamóttöku þar sem áverkar hennar voru skoðaðir. Vilhjálmur H. Vilhjálmsson, lögmaður konunnar, staðfestir í samtali við Vísi að hann sé að skoða líkamsárásina og stöðu skjólstæðings síns.

Lögreglu var tilkynnt um atvikið en þegar lögreglumenn komu á vettvang var bíllinn yfirgefinn úti í vegakanti.

Ölvaður undir stýri

Handtakan í Borgarnesi var síðdegis á laugardaginn. Maðurinn og konan höfðu farið saman út úr bænum en sinnast og ákveðið að halda aftur til borgarinnar. Í Borgarnesi sauð upp úr og fóru þau hvort á sinn staðinn í Borgarnesi, verslun Olís annars vegar og Hyrnuna hins vegar.

Maðurinn virðist hafa tekið til við drykkju en eftir að fólkið hafði rætt málin og ákveðið að aka saman til borgarinnar stöðvaði lögregla bílinn vegna gruns um að maðurinn væri ölvaður. Var hann handtekinn, færður á lögreglustöð áður en honum var sleppt.

Tók konan við akstri bílsins. Samkvæmt heimildum Vísis lét maðurinn ófriðlega í aftursæti bílsins, reif í konuna og var svo ágengur að konan keyrði að endingu út í vegakant og hljóp undan manninum.

Greindi frá áralöngu ofbeldi

Oft er talað um litla Ísland og það átti svo sannarlega við þegar ökumaður sem var á ferð á Vesturlandsvegi stöðvaði bíl sinn til að hjálpa konunni. Þar var á ferðinni vinkona systur fyrrverandi sambýliskonu mannsins sem hefur sömuleiðis sakað manninn um gróft ofbeldi yfir langan tíma.

Konan var í sambúð með manninum í 17 ár og sagði hún í viðtali við Fréttablaðið á dögunum að maðurinn hefði margoft gengið í skrokk á henni, yfirleitt fyrir framan börnin þeirra, og hótaði henni meðal annars með hníf.

Hún hringdi margoft í lögregluna og bað um aðstoð en kærði ekki vegna meðvirkni og ótta við hann. Þá laug hún til um áverkana þegar hún leitaði aðstoðar læknis á heilsugæslu eða fjölskylda eða vinir spurðu út í þá.

Sætir rannsókn í Texas

Maðurinn, sem er tæplega fertugur, var handtekinn í Texas þann 9. mars vegna gruns um að hafa ráðist á kærustuna sína á hóteli í miðbæ Austin.

Maðurinn var látinn laus úr fangelsinu gegn sex þúsund dollara tryggingu, um 650 þúsund króna.

Málið er til rannsóknar hjá lögreglunni í Texas en til undatekninga heyrir að saksóknarar í ríkinu falli frá ákæru. Því má fastlega búist við því að málið fari fyrir dóm þar í landi.

Maðurinn á sér ekki brotasögu en hefur verið stefnt fyrir ærumeiðingar. Maðurinn dró orð sín til baka svo ekki kom til þess að dómur félli í málinu.

Ekki náðist í manninn við vinnslu fréttarinnar.