Fá ekki upplýsingar um ráðningu nýs sviðsstjóra

Sjálfstæðismenn í borginni sátu hjá þegar nýr sviðsstjóri menningar- og ferðamálasviðs Reykjavíkurborgar, Arna Schram, var ráðin á fundi borgarráðs í dag. Ástæðan er að þeir fengu ekki afhentar allar upplýsingar er snúa að ráðningunni. Þeir taka sérstaklega fram að ekki séu gerðar athugasemdir við einstaklinginn sem ráðinn var.

Meirihlutinn segir að starfsumsóknir og mat á umsækjendum falli skýlaust undir persónulega hagi einstaklinga. Óheimilt sé að afhenda gögn sem varði persónulega hagi fólks.

Í bókun Sjálfstæðismanna segir að hingað til hafi borgarfulltrúar fengið slík gögn afhent, óski þeir eftir því. Borgarráðsmenn hafi skýlausan rétt á upplýsingum varðandi þau mál sem lögð séu fyrir borgarráð á því formi sem þeir óski eftir.

„Vekur furðu að meirihluti Samfylkingar, Bjartrar framtíðar, Pírata og

Vinstri grænna kjósi nú að ganga gegn langri hefð um afhendingu slíkra gagna til

borgarfulltrúa, sé óskað eftir því,“ segir í bókuninni. Þá er gerð alvarleg athugasemd við vinnubrögð meirihlutans og óska nýjum sviðsstjóra velfarnaðar í starfi.

Meirihlutinn neitar að um sé að ræða takmörkun á aðgengi gagna því borgarráðsfulltrúum hafi verið gefinn kostur á að kynna sér öll gögn málsins. Þá hefði verið fallist á frest á málinu ef þess hefði verið óskað og gögnin þá áfram verið aðgengileg fram að afgreiðslu málsins.

Fram kemur á vef Reykjavíkurborgar að það hafi verið samdóma álit valnefndar sem fór yfir umsóknir og tók viðtöl við umsækjendur að Arna Schram uppfyllti best umsækjenda þær kröfur sem gerðar eru til starfsins.

Arna hefur starfað sem forstöðumaður menningarmála hjá Kópavogsbæ síðan í febrúar 2011. Hún hefur lokið B.A. gráðu í stjórnmálafræði og heimspeki frá Háskóla Íslands og Kaupmannahafnarháskóla auk MBA gráðu með áherslu á stjórnun, rekstur og markaðsmál frá Háskólanum í Reykjavík.

Hlutverk sviðsstjóra menningar- og ferðamálasviðs Reykjavíkurborgar er dagleg yfirstjórn á menningar- og ferðamálasviði auk þess sem hann ber ábyrgð á rekstri, þjónustu og stjórnsýslu sviðsins.