Innanríkisráðuneytinu skipt upp

Forseti Íslands hefur staðfest tillögur forsætisráðherra um breytt skipulag Stjórnarráðs Íslands, þess efnis að innanríkisráðuneytinu verði skipt upp. Breytingarnar fela í sér að í stað innanríkisráðuneytis komi annars vegar dómsmálaráðuneyti og hins vegar samgöngu- og sveitarstjórnarráðuneyti.

Þannig fjölgar ráðuneytum úr átta í níu, og munu hin nýju ráðuneyti taka til starfa 1. maí næstkomandi. Málefnasvið hinna nýju ráðuneyta verða tilgreind með sama hætti og störfum er nú skipt á með dómsmálaráðherra og samgöngu- og sveitarstjórnarráðherra, að því undanskildu að málefni Þjóðskrár Íslands og Yfirfasteignamatsnefndar nú tilheyra samgöngu- og sveitarstjórnarráðherra.

Þá eru samhliða gerðar breytingar á verkaskiptingu milli forsætisráðuneytis og fjármála- og efnahagsráðuneytis er lúta að framkvæmd laga um Seðlabanka Íslands. Þær fela í sér að setning reglna um reikningsskil og ársreikning bankans verður á hendi fjármála- og efnahagsráðuneytis, svo og samskipti við bankann í tengslum við ákvörðun um eiginfjármarkmið hans, ráðstöfun hagnaðar og samkomulags um framkvæmd innköllunar.