Lindex lækkar verð vegna styrkingar krónunnar

Lindex á Íslandi hefur ákveðið að lækka verð í verslunum sínum um allt að 24 prósent vegna styrkingar krónunnar en verðlækkunin nemur 11 prósentum að meðaltali.

Í tilkynningu frá Lindex segir að íslenska krónan hafi undanfarið styrkst gagnvart flestum erlendum gjaldmiðlum ásamt því að nokkur stöðugleiki sé kominn með tilkomu fljótandi gengisviðskipta með íslensku krónuna.

„Undanfarnar vikur hefur verið skoðað  sérstaklega áhrif þess að krónan var sett á flot í fyrsta sinn í tæp tíu ár.  Í ljósi þessara breytinga er sérlega skemmtilegt að geta skilað þessari búbót til okkar viðskiptavina.  Við munum nú, sem endranær, kappkosta að bjóða okkar vörur á sem hagkvæmasta verði og leitum stöðugt leiða til að ná því fram,“ er haft eftir Lóu Dagbjört Kristjánsdóttur, umboðsaðila Lindex á Íslandi í tilkynningu.