Segja bréf May fela í sér hótanir

Gagnrýnendur Theresu May á Breska þinginu hafa sakað hana  um blygðunarlausar hótanir í garð Evrópusambandsins. The Guardian greinir frá. 

May afhenti afhenti Donald Tusk, forseta leiðtogaráðs Evrópusambandsins, bréf í morgun sem hrinti af stað tveggja ára úrsagnarferli Breta úr sambandinu.

Í bréfinu varaði May við því að ef samkomulag næðist ekki myndi slíkt veikja samstarf ríkjanna í baráttunni gegn glæpum og hryðjuverkum.

Framámenn í Brussel hafa einnig kvartað yfir orðum May.

Guy Verhofstadt, sem er milliliður Evrópuþingsins í Brexit-málinu, hefur lýst því yfir að meðlimir Evrópuþingsins myndu ekki sætta sig við tilraunir Breta til þess að tefla fram styrkleikum sínum á sviði hernaðar og leyniþjónustu í samingaviðræðunum. 

„Ég tel að öryggi borgaranna sé allt of mikilvægt til þess að sýsla svona með það.“

Gianni Pittella, meðlimur Evrópuþingsins tók undir með Verhofstadt.

„Það væri hneykslanlegt að spila svona með líf fólks í þessum samningaviðræðum. Theresa May byrjar ekki vel.“