Grikkir bíða ákvörðunar evruríkjanna um framhald aðstoðar

Í dag hittast í Brussel fjármálaráðherrar evruríkjanna til að ræða framhald á fjárhagsaðstoð við Grikkland.

Grikkir þurfa nauðsynlega á því að halda að fá fé í ríkissjóðinn til að geta borgað upp í skuldir, sem nú nema nærri 180 prósentum af þjóðarframleiðslunni.

Alexis Tsipras forsætisráðherra neitar að skera meira niður í ríkisrekstrinum nema einhverju af skuldunum verði aflétt. Christine Lagarde, yfirmaður Alþjóðagjaldeyrissjóðsins, tekur undir kröfur Grikkja um að þeir fái einhverjar skuldaniðurfellingar. Hún hefur sagt að sjóðurinn geti varla tekið þátt í frekari efnahagsaðstoð við Grikkland nema þeir fái niðurfelldar skuldir.

Wolfgang Schäuble, fjármálaráðherra Þýskalands, útilokar hins vegar alfarið alla skuldaeftirgjöf.

Hann stendur fast á því að Grikkir eigi að ráða við vandann ef þeir haldi áfram á þeirri braut niðurskurðar sem þeir hafa verið á undanfarin ár.

„Ef Grikkir gera nauðsynlegar efnahagsumbætur þá lenda þeir ekki í vanda. En ef þeir gera það ekki, þá verða þeir í vanda staddir,“ sagði Schäuble í sjónvarpsviðtali í gær.

Grikkir hafa frá árinu 2010 þrisvar sinnum fengið efnahagsaðstoð frá evruríkjunum og Alþjóðagjaldeyrissjóðnum. Síðast var það samþykkt í ágúst árið 2015 og hafa þeir fengið hluta þeirrar aðstoðar greiddan.Næsta greiðsla verður í maí fallist þeir á frekari efnahagsumbætur.

Fréttin birtist fyrst í Fréttablaðinu.