Lengsta kjaradeila á borði ríkissáttasemja frá upphafi

Fiskiskipafloti útgerðanna streymir út á miðin eftir að verkfalli sjómanna var aflýst en sjómenn samþykktu nýjan kjarasamning með naumum meirihluta í gærkvöldi. Kjaradeila sjómanna er sú lengsta sem embætti ríkissáttasemjara hefur haft á sínu borði frá stofnun embættisins.

Um klukkustund eftir að samþykkja nýjan kjarasamning við útgerðarmenn og verkfalli hafði verið aflýst var öll áhöfnin á Ásbirni RE50 mætt í skip að búa sig til brottfarar.

En spólum aðeins aftur í tímann. Samninganefndir sjómanna og útgerðarmanna skrifuðu undir nýjan kjarasamning á þriðja tímanum aðfaranótt laugardags og strax sama dag og fram á sunnudag var samningurinn kynntur sjómönnum og fór hann til atkvæðagreiðslu. En hún stóð stutt yfir og á áttunda tímanum í gærkvöldi voru kjörkassar með atkvæðum sjómanna um nýjan kjarasamning bornir inn í húsakynni ríkissáttasemjara. Fulltrúar sjómanna tóku sig til og undirbjó talningu sem hófst formlega klukkan átta.

Á meðan sátu fulltrúar SFS frammi og biðu niðurstöðunnar en skömmu seinna voru þeir kallaðir inn í fundarherbergi sjómanna þar sem farið var yfir úrslit kosninganna. Eftir það fengu fjölmiðlar hvernig atkvæðagreiðslan hefði farið.

Já sögðu 623 eða 52,4%, nei sögðu 558 eða 46,9%. Auðir og ógildir voru átta eða 0,7% og samningurinn telst því samþykktur að hálfu sjómanna og stjórn SFS samþykkti samninginn líka einróma,“ sagði Bryndís Hlöðversdóttir, ríkissáttasemjari.

Samkvæmt upplýsingum frá ríkissáttasemjara er deilan sú lengsta í sögu embættisins frá upphafi. Samningur sjómanna við útgerðina losnaði 1. janúar árið 2011 og þangað til í gær voru sjómenn án kjarasamnings í 2242 daga eða sex ár, einn mánuð og nítján daga.

Kjaradeilan fór til ríkissáttasemjara 22. maí 2012 og var þar í 1735 daga.

 

Skárri kosturinn valinn

Fulltrúar sjómanna og útgerðamanna voru fegnir niðurstöðunni og fóru strax í að tilkynna um niðurstöðuna svo skip gætu haldið til sjós eins fljót og auðið var.

„Við erum komin með samning sem að báðir aðilar hafa samþykkt og það er ótrúlega dýrmætt að það þurfti ekki að grípa til inngrips þriðja aðila,“ sagði Heiðrún Lind Marteinsdóttir, framkvæmdastjóri Samtaka fyrirtækja í sjávaraútvegi.

„Það held ég alveg örugglega. Ég held að menn hafi alveg gert sér grein fyrir því að það gætu komið lög á menn ef þetta yrði ekki samþykkt enda held ég að menn hafi valið skárri kostinn,“ sagði Valmundur Valmundsson, formaður Sjómannasambands Íslands.

„Ég svona þessa tilfinningu að við myndum klára þetta og ná þessu í gegn núna þegar við skrifuðum undir og við fengum staðfestingu á því í kvöld og ég er bara gríðarlega ánægður og þakklátur,“ sagði Jens Garðarsson, formaður Samtaka fyrirtækja í sjávarútvegi.

Ósáttur við aðkomu sjávarútvegsráðherra

Það var samt tæpt að samningurinn yrði samþykktur og athyglu vekur að rétt rúmlega fimmtíu prósent þeirra sem voru að kjörskrá tóku þátt í atkvæðagreiðslunni.

„Það er alltaf þannig að þegar verið er að leysa eina erfiðustu kjaradeilu Íslandsögunnar, ef þannig má að orði komast að þá er viss léttir í því. Það er alltaf smá kvíðbogi yfir því þegar atkvæðagreiðsla fer með þessum hætti þar sem að helmingur félagsmanna er ekki sáttur,“ sagði Vilhjálmur Birgisson, formaður Verkalýðsfélags Akraness.

Verkfall sjómanna hefur haft víðtæk áhrif, þá sérstaklega á landvinnsluna en meira en fimmtán hundruð manns voru komnir á atvinnuleysisskrá vegna verkfallsins.

„Í mínu bæjarfélagi og hjá mér eru fleiri hundruð fiskvinnslukonur, ég er með þannig stéttarfélag, þetta er deildaskipt félag, þannig að ég hef haft miklar áhyggjur af þessu öllu saman og við höfum reynt að leggja okkur í líma við að reyna leysa þessa erfiðu deilu,“ sagði Vilhjálmur

Og Vilhjálmur var ekki sáttur við aðkomu sjávarútvegsráðherra að kjaradeilunni.

„Ég neita núna að tjá mig um aðkomu sjávarútvegsráðherra. Hún var henni ekki til sóma. Svo mikið er víst,“ sagði Vilhjálmur.

Sjómenn fegnir að vera aftur komnir til starfa

Þrátt fyrir að tæpur helmingur sjómanna hafi ekki mætt á kjörstað og greitt samningnum atkvæði um helgina eru flestir fegnir því að vera komnir til vinnu aftur. Eins og sjá mátti á Reykjavíkurhöfn eru flest þeirra skipa sem voru þar í gær, farin til veiða.

„Það verður gott að komast í vinnuna aftur,“ sagði Friðleifur Eiríksson, skipstjóri á Ásbirni RE 50 í gær.

„Ég held að það hafi ekki verið neitt meira í boði. Við komum sæmilega út úr þessu en það hefði verið hægt að gera betur,“ sagði Emil Sigurður Magnússon, stýrimaður á Ásbirni en rætt var við fleiri skipverja á Ásbirni en innslagið í heild sinni má sjá hér að ofan.