Skipuleggjendur tískuvikunnar í New York ósáttir með Kanye West

Líkt og áður hefur komið fram mun Kanye West sýna Yeezy Season 5 á tískuvikunni í New York núna í byrjun febrúar. Nú er hins vegar komið í ljós að hann og Adidas spurðu hvorki kóng né prest þegar þau ákváðu tímasetninguna fyrir sýninguna. Enn og aftur skarast hún á við annan hönnuð, að þessu sinni Marchesa. 

Samkvæmt tilkynningu CFDA sem er tískuráð Bandaríkjana og skipuleggur tískuvikuna er þetta ekki í fyrsta sinn sem Kanye gerir þetta. Þar kemur einnig fram að þau muni því ekki skrá Yeezy-sýninguna á formlega dagskrá tískuvikunnar. 

Í gegnum tíðina hafa hönnuðir sem Yeezy sýningin stangast við átt í stökustu vandræðum með að færa til tímasetningarnar á sýningum sínum. Í haust voru það alls fjórar sýningar sem fundu fyrir þessu, eða sýningar Whit, Michelle Helene, R13 og sýning meistaranema Parsons skólans.