Andlegt hrun á lokakaflanum

Íslenska liðið gerði nánast allt rétt gegn Makedóníu í Metz í gær en liðið fór algjörlega á taugum á síðustu fimmtán mínútum leiksins og varð að sætta sig að lokum við jafntefli, 27-27.

Þetta var stórfurðulegur leikur. Íslenska liðið fór eiginlega á taugum bæði í upphafi og í lok leiksins. Spennustigið var allt of hátt í upphafi og liðið lenti fjórum mörkum undir, 0-4. Því var svo svarað með fimm mörkum og 9-2 kafla. Í hálfleik leiddi Ísland með tveimur mörkum, 15-13.

Máttu þakka fyrir að tapa ekki

Er korter var eftir af leiknum var Ísland með fimm marka forskot, 24-19, gegn dauðþreyttum Makedóníumönnum. Það var lag að labba yfir þá en í staðinn varð andlegt hrun. Ísland tapaði síðasta stundarfjórðungnum 8-3 og mátti í raun þakka fyrir að hafa ekki tapað að lokum. Makedónía fékk nefnilega boltann er 18 sekúndur voru eftir en neitaði að sækja. Jafntefli dugði þeim til að ná þriðja sætinu.

Túnisbúar hafa aftur á móti líklega brjálast yfir því að þeir hafi ekki sótt í lokin og unnið leikinn því þá hefði Túnis farið til Lille að spila við Frakkland. Ísland fer til Lille á markatölu. Lokaspretturinn gegn Angóla skilaði sínu að lokum.

Það voru ekki bara leikmenn sem fóru á taugum í lokin því Geir landsliðsþjálfari ætlaði að taka leikhlé allt of seint í síðustu sókninni. Rúnar tekur skotið 18 sekúndum fyrir leikslok en leikhléið hefði mátt koma allt að tíu sekúndum fyrr.

Reynslan ómetanleg

Það má vissulega gagnrýna ýmislegt en ljósu punktarnir eru fleiri en þeir neikvæðu. Íslenska liðið er að taka framförum í nánast hverjum leik og hefur í raun staðið sig mun betur en ansi margir áttu von á.

Andlega hliðin mun lagast og sérstaklega eftir þá reynslu sem liðið hefur fengið á þessu móti. Hún er algjörlega ómetanleg og Geir hefur verið óhræddur við að senda óreynda menn inn á völlinn í alvöruleikjum og á erfiðum tímum. Landsliðið mun græða á þessu innleggi landsliðsþjálfarans.

Rúnar Kárason hefur algjörlega blómstrað á þessu móti og hélt því áfram í gær. Dró íslenska vagninn í fyrri hálfleik. Tók af skarið og skoraði er liðið þurfti á að halda. Var líka sterkur í vörninni. Frábært að fylgjast með honum. Bjarki Már Elísson spilaði seinni hálfleikinn frábærlega og er að gera eitthvað sem margir töldu óhugsandi. Það er tilkall til þess að taka hornastöðuna af sjálfum fyrirliðanum. Það lekur af honum sjálfstraustið og nýtingin hefur verið góð.

Himnasending

Bjarki Már Gunnarsson hefur komið eins og himnasending úr stúkunni í Metz og átti aftur geggjaðan leik í vörninni. Átti ekki að fá að spila en hefur svarað fyrir sig eins og höfðingi. Hann á mikið hrós skilið.

Nú fær íslenska liðið æðislegt verkefni um helgina. Leikur gegn heimamönnum á knattspyrnuvellinum í Lille þar sem sett verður nýtt met yfir flesta áhorfendur á HM. Von er á 28 þúsund áhorfendum. Vonandi ná strákarnir að halda áfram að bæta sig og stríða heimsmeisturunum rækilega.