Naktir í náttúrunni í Hveragerði: „Þetta er ótrúlega frelsandi“

Sex karlar í Hveragerði ráðast ekki á garðinn þar sem hann er lægstur því þeir munu taka að sér næstu vikurnar að berhátta sig fyrir áhorfendur sem mæta á sýninguna „Naktir í náttúrunni“ hjá Leikfélagi Hveragerðis.

Leikararnir segja ótrúlega frelsandi að vera berrassaðir á sviðinu.

Leikfélag Hveragerðis fagnar 70 ára afmæli á árinu og því var ákveðið að ráðast í alvöru verk á afmælisárinu, „Naktir í náttúrunni“.

Handritið byggir á kvikmyndinni „The full monty“ en er staðfært að Hveragerði. Æfingar hafa staðið yfir síðustu sex vikur og nú er byrjað að sýna leikritið á fullum krafti við góðar viðtökur.

„Verkið gengur út á garðyrkjubændur sem eru í kröggum af því að rafmagnsverðið er svo hátt að þeir þurfa að strippa til þess að fá auka pening og halda konukvöld í sveitinni," segir Jón Gunnar Þórðarson leikstjóri.

„Við erum montin af því að vera svona öflugt áhugaleikfélag og höfum tekið á móti þúsundum manna oft á tíðum,“ segir Hjörtur Benediktsson, formaður Leikfélags Hveragerðis.

Karlarnir sex sem leika í strippatriðunum segja ekkert mál að klæða sig úr öllum fötunum fyrir áhorfendur.

Strippararnir Sigurður Sólmundarson og Runólfur Óli Daðason segja nektina venjast vel. Hún sé í raun mjög frelsandi.

„Maður er voðalega mikið að skipta í og úr og er mjög mikið nakinn. Þetta venst voðalega vel. Ég er til dæmis farinn að vera mjög mikið nakinn í vinnunni, mér finnst það mjög þægilegt,“ segir Sigurður og tekur Runólfur í sama streng:

„Þetta er ótrúlega frelsandi. Þetta er miklu meira frelsandi en maður hélt fyrst,“ segir Runólfur.

Maður er voðalega mikið aðskipta í og úr og er mjög mikið nakinn. Þetta venst voðalega vel, ég er farinn til dæmis að vera mjög mikið nakinn í vinnunni mér finnst það mjög þægilegt.