Fólk á sjötugsaldri mætti best á kjörstað

Verulegur munur var á kosningaþátttöku í alþingiskosningunum 29. október eftir aldurshópum. Þátttakan var minnst meðal kjósenda á aldrinum 20-24 ára, eða 65,7 prósent. Mest var hún í aldurshópnum 65-69 ára eða 90,2 prósent. Svipað var uppi á teningnum í síðustu forsetakosningum og í sveitarstjórnarkosningum 2014. Kosningaþátttakan í heild, 79,2 prósent, hefur aldrei verið minni.

„Yngra fólk hefur ekki komið því upp í vana að mæta á kjörstað en kemur síðan inn um 25 til 27 ára aldurinn,“ segir Eva H. Önnudóttir, nýdoktor í stjórnmálafræði, sem hefur tekið í þátt í Íslensku kosningarannsókninni á vegum Félagsvísindastofnunar undanfarin ár. Það sé hins vegar nýtt sem sjáist núna í Íslensku kosningarannsókninni að nú sé að koma upp kynslóð fólks, sem kýs ekki þó hún hafi náð 26 til 27 ára aldri. „En þetta er bara smá trend sem maður sér og það virðist sjást betur í öðrum ríkjum þar sem kosningaþátttaka er lakari,“ segir hún.

Niðurstöður skoðanakönnunar Fréttablaðsins, Stöðvar 2 og Vísis sem birt var að kvöldi 27. október bendir til þess að ólík kosningaþátttaka eftir aldurshópum kunni að hafa haft veruleg áhrif á niðurstöður kosninga. Þannig sögðust einungis 10,2 prósent kjósenda í aldurshópnum 50 ára og eldri ætla að kjósa Pírata en 23,9 prósent þeirra sem voru í aldurshópnum 18-49 ára. Píratar áttu því mikið undir því að fólk undir fimmtugu skilaði sér á kjörstað.

Eva segir að áherslur stjórnmálaflokkanna séu mikilvægar til þess að ýta undir kosningaþátttöku. „Kosningabaráttan skiptir máli og það hefur stundum verið rætt um það hvort það eigi að beina sjónum sérstaklega að augum ungs fólks. Maður hefur stundum séð það gert og það er mikilvægt,“ segir Eva. Á hinn bóginn kunni stjórnmálaflokkar að vilja beina athyglinni frekar að þeim hópi sem er líklegri til að mæta á kjörstað en aðrir hópar.

Eva segir að unga fólkið geti líka gripið til ráðstafana til þess að ýta undir áhuga ungmenna á því að kjósa. „Þessar skuggakosningar sem voru haldnar núna í framhaldsskólunum voru frábært framtak. Allt svona skiptir rosalega miklu máli til þess að ýta undir þátttöku,“ segir hún. Þar vísar hún til kosninga á vegum Landssambands æskulýðsfélaga og Sambands íslenskra framhaldsskólanema sem voru settar upp eins og almennar kosningar og fram fóru í framhaldsskólunum 13. október. Megintilgangurinn var að þjálfa þau sem ekki hafa náð kosningaaldri í að kjósa og undirbúa þau sem hafa aldur til fyrir að kjósa í fyrsta sinn. 

Fréttin birtist fyrst í Fréttablaðinu