Úrval Útsýn ræður þrjá nýja

Úrval Útsýn er leiðandi ferðaskrifstofa sem hefur þjónustað landsmenn um áratugaskeið. Vegna vaxandi umsvifa hefur Úrval Útsýn ráðið til sín reynslumikið fólk til að bæta enn frekar þjónustu við viðskiptavini sína segir í tilkynningu.

Jóhann Björgvinsson hefur verið ráðinn sem sölustjóri Úrvals Útsýnar. Jóhann starfaði áður sem fararstjóri Úrvals Útsýnar á Tenerife í 5 ár og þekkir því vel inn á sólarlandamarkaðinn. Áður en Jóhann hóf störf í ferðageiranum starfaði hann erlendis um árabil við eigin rekstur í verslunarrekstri og framkvæmdastjórn.

Kristín Gunnarsdóttir hefur verið ráðin sem framleiðslustjóri hópa- og sérferða Úrvals Útsýnar. Kristín hefur mikla reynslu úr ferðageiranum þar sem hún starfaði hjá Icelandair og öðrum ferðaskrifstofum á árunum 1980-2012. Síðustu árin hefur Kristín starfað hjá Seðlabankanum, þar sem hún sá um ferðir starfsmanna.

Luka Kostic hefur verið ráðinn yfirmaður íþróttadeildar Úrvals Útsýnar. Luka þekkir vel til íþróttaferða þar sem hann vann hjá í íþróttadeild Úrvals Útsýnar á árunum 2009-2014. Síðustu 2 ár hefur hann rekið ferðaskrifstofuna Markferðir sem seldi íþróttaferðir. Luka kemur úr íþróttunum, er fyrrum knattspyrnumaður og sá síðar um þjálfun á yngri landsliðum í fótbolta.

„Við erum mjög ánægð að fá svo góðan og reynslu mikinn liðsauka til okkar þar sem það hefur verið mikil aukning í borgarferðum , sérferðum  og hópum á þessu ári. Það stefnir í enn frekari aukningu á næsta ári vegna aukins framboðs á flugi til og frá Íslandi. Núna fljúga 34 flugfélög til og frá landinu og hægt er að bóka þau öll í gegnum okkur, sérstaklega þægilegt fyrir fyrirtæki að nýta sér þá þjónustu hjá okkur,“ segir Þórunn Reynisdóttir forstjóri Ferðaskrifstofu Íslands sem rekur ferðaskrifstofurnar Úrval Útsýn, Sumarferðir og Plúsferðir.