Guðmundur segir frá leyndarmálinu á bak við það að gera Dani að Ólympíumeisturum

Guðmundur Guðmundsson, landsliðsþjálfari Dana í handbolta, mun halda athyglisverðan fyrirlestur á morgun fimmtudag.

Fyrirlesturinn heitir: „Danska landsliðið og leiðin að gullinu í Ríó 2016.“ Hann mun fara fram í Valsheimilinu annað kvöld klukkan 19.30.

Guðmundur ætlar þar að upplýsa um lykilatriðin sem gerðu það að verkum að Danir urðu Ólympíumeistarar í ágúst síðastliðnum.

Danir tryggðu sér gullið með sigri á hinu geysisterka franska liði í úrslitaleiknum en höfðu áður slegið Slóvena út úr átta liða úrslitunum og Pólverja út í undanúrslitunum.

Þetta var í fyrsta sinn sem Danir vinna til verðlauna í handbolta karla á Ólympíuleikum en danska liðið varð í 6. sæti 2012 og í 8. sæti 2008.

Guðmundur varð í 2. sæti með íslenska landsliðið á ÓL 2008 og í 5. sæti á ÓL 2012. Þetta voru hans sjöttu Ólympíuleikar sem leikmanns (2) eða þjálfara (4).

Valsmenn auglýsa fyrirlesturinn hans Guðmundar inn á heimasíðu sinni en aðgangur á hann er ókeypis.

Guðmundur Guðmundsson er nú að hefja undirbúning danska landsliðsins fyrir HM í Frakklandi í janúar en þar mun hann stýra danska liðinu í síðasta sinn.

Guðmundur ákvað að framlengja ekki samning sinn við danska handboltasambandið en samningurinn hans rennur út næsta sumar.

Mikið hefur gengið á hjá danska sambandinu eftir sigurinn í Ríó og frábær árangur Guðmundar með liðið var ekki nóg til að búa til ásættanlegt starfsumhverfi fyrir íslenska þjálfarann.