Mourinho: Létum eins og þetta væri æfingaleikur

Jose Mourinho, stjóri Man. Utd, var ekki ánægður með lærisveina sína í Tyrklandi í gær þar sem Man. Utd tapaði, 2-1, gegn Fenerbahce í Evrópudeildinni.

„Lið sem fær á sig mark eftir tvær mínútur er lið sem er ekki tilbúið í slaginn. Er ekki með einbeitinguna í lagi,“ sagði Mourinho hundfúll en hans lið hefur aðeins unnið tvo af síðustu sjö leikjum sínum í öllum keppnum.

Þess utan hefur Man. Utd aðeins skorað tvö mörk í síðustu fjórum leikjum og ekki náð að skora í fyrri hálfleik í sjö af síðustu átta leikjum sínum. Það virðist lítið hafa breyst frá síðustu leiktíð.

„Vandamálið í þessum leik var viðhorfið. Þeir litu á þennan leik sem úrslitaleik Meistaradeildarinnar en við létum eins og þetta væri æfingaleikur. Þess vegna átti Fenerbahce skilið að vinna. Fótbolti snýst ekki bara um gæði,“ sagði Mourinho sem var þó ánægður með að Wayne Rooney skildi skora.