Ætlar að fara fram á rannsókn

Óskar Steinn Ómarsson, ritari Samfylkingarinnar, ætlar að fara fram á að stjórn flokksins rannsaki hvort innflytjendum hafi verið lofað ríkisborgararétti gegn því að kjósa tiltekinn frambjóðanda í prófkjöri Samfylkingarinnar fyrir Alþingiskosningarnar 2013. Hann segir sér vera verulega brugðið vegna þessara ásakana og að séu ásakanirnar á rökum reistar verði að „grípa til aðgerða til að svona lagað komi ekki fyrir aftur.

Helga Vala Helgadóttir, lögmaður og fyrrverandi formaður Samfylkingarfélags Reykjavíkur hefur haldið því fram að fyrir fjórum árum hafi fólki sem er af víetnömskum uppruna verið lofað ríkisborgararétti gegn því að kjósa Össur Skarphéðinsson, þá utanríkisráðherra, í 1. sæti í prófkjöri Samfylkingarinnar.

Össur segir ásakanirnar vera sérkennilegar og hann hafi sjálfur aldrei komið nálægt slíkum æfingum.

Sjá einnig: Helga Vala: Lofað ríkisborgararétti gegn því að kjósa Össur í prófkjöri

Óskar Steinn segist ætla að fara fram á að sannleikurinn í málinu verði dreginn upp á yfirborðið.

„Eins og flestum öðrum er mér verulega brugðið vegna þessara ásakana. Að misnota fólk í viðkvæmri stöðu með þessum hætti er fullkomlega siðlaust og það eru vinnubrögð sem eiga ekki að líðast í neinum stjórnmálaflokki,“ segir Óskar Steinn á Facebooksíðu sinni.