Mikill vöxtur hjá Renault Group á fyrri árshelmingi

Á fyrri árshelmingi þessa árs jókst sala nýrra bíla á alþjóðamarkaði um 2,5% miðað við fyrra ár. Renault Group jók söluna 13,4% sem skilaði samstæðunni aukinni markaðshlutdeild um 0,3 prósentustig og nemur hlutdeild hennar nú 3,5% á heimsvísu. Alls seldust tæplega 1,6 milljónir bíla frá Renault Group fyrstu sex mánuði ársins.

Mest varð söluaukning Renault Group í Evrópu en einnig varð mikill vöxtur á öðrum markaðssvæðum, svo sem á helstu mörkuðum Afríku, Mið-Austurlanda og Indlands. Sala á Renault óx um 16% á heimsvísu, hjá Renault Samsung Motors óx sala um 25,9% í Asíu og sala á Dacia hélt áfram að aukast eins og undanfarin ár og hafa aldrei selst jafnmargir bílar frá rúmenska framleiðandanum og raunin varð þessa fyrstu sex mánuði ársins í ár þar sem 9% aukning varð að sögn Thierry Koskas, framkvæmdastjóra hjá Renault Group.

Í Evrópu voru nýskráningar bíla frá Renault Group fleiri en sem nam vexti markaðarins. Þannig voru nýskráningar á bílum frá samstæðunni 14% fleiri fyrstu sex mánuðina en á sama tíma 2015 á meðan Evrópumarkaðurinn í heild stækkaði um 9,6%. Alls voru 968.603 bílar frá Renault Group nýskráðir á tímabilinu og er markaðshlutdeild samstæðunnar nú 10,6% í Evrópu.

Sé aðeins litið til Renault jókst salan um 15,6% sem einkum er þökkuð velgengni nýrra bíla á borð við Kadjar, Espace, Talisman og Megane. Þá er Clio 4 orðinn næst söluhæsti bíllinn í Evrópu ásamt því sem sportjeppinn Captur leiðir söluna í sínum flokki í álfunni. Á rafbílamarkaði er Renault nú kominn með 27% hlutdeild í Evrópu sem einkum er rakin til mikilla vinsælda ZOE sem jók söluna um 40% fyrstu sex mánuði ársins.