Forsíðuþátturinn er úr smiðju Silju Magg en hún myndaði hollensku fyrirsætuna Marloes Horst í sannkölluðum diskómyndaþætti sem fagnar tísku áttunda áratugarins með sínum útvíðu buxum, glans, glimmeri svo ekki sé minnst á lituðu stóru gleraugun.
Horst hefur prýtt forsíður helstu tímarita í heiminum ásamt því að vera eitt af andlitum Maybelline, Lindex, Forever 21 og Diesel svo eitthvað sé nefnt.
Seinustu dreggjarnar af sumartískunni eru gerð góð skil ásamt því að við leiðbeinum lesendum í gegnum útsölukaupin og kíkjum í fataskápinn hjá íslensku smekkfólki (af nógu er að taka). Hárið er í stóru hlutverki í fegurðarkaflanum, hvernig á að þvo á sér hárið og 30 nýjar hárgreiðslur fyrir hvern dag mánaðarins svo eitthvað sé nefnt.
Við gerð blaðsins greip um sig mikið fótboltaæði hjá þjóðinni sælla minninga og enginn undantekning þar á hjá ritstjórn Glamour. Okkur langaði að kynnast betur stelpunum okkar, íslensku landsliðsstelpunum, sem hafa heldur betur gert það gott á vellinum og eru þessa stundina að vinna að því að tryggja sæti á EM í Hollandi á næsta ári. Við hóuðum saman nokkrum landsliðsstelpum í myndatöku og viðtal þar sem talað var um boltann, barneignir og þegar sumar fóru úr að ofan til að lokka áhorfendur á völlinn.
Glænýtt og fjölbreytt tölublað af Glamour er komið í allar helstu verslanir - tryggðu þér áskrift hér, í síma 512 5550 eða á glamour@glamour.is.
