Jón Axel og Tryggvi Snær settu met með frammistöðunni gegn Rússlandi

Eins og kom fram í gær vann U20 ára landslið karla í körfubolta frækinn sigur á stórliði Rússlands á Evrópumótinu í Grikklandi, 71-65. Íslensku strákarnir voru 25-9 undir eftir fyrsta leikhluta en sneru svo taflinu sér í hag.

Tveir leikmenn báru af í íslenska liðinu en það voru Grindvíkingurinn Jón Axel Guðmundsson og norðanmaðurinn hávaxni Tryggvi Snær Hlinason sem spilar með Þór á Akureyri.

Jón Axel skoraði 32 stig, tók ellefu fráköst og stal fimm boltum en aldrei áður hefur nokkur drengur skorað jafnmikið í einum leik í lokakeppni EM U20 ára.

Hinn 216 cm hái Tryggvi Snær, sem körfuboltamenn geta ekki beðið eftir að sjá í Dominos-deildinni í fyrsta sinn í vetur, tók þrettán sóknarfráköst en það er einnig met á mótinu, að því fram kemur á heimasíðu FIBA.

Tryggvi Snær skoraði ellefu stig og tók í heildina 19 fráköst í þessum frábæra sigri, en strákarnir mæta Eistlandi í þriðja leik liðsins klukkan 15.45 að íslenskum tíma í dag.

Jón Axel spilaði með Grindavík í Dominos-deildinni í vetur en samdi undir lok tímabilsins við Davidson-háskólann í Bandaríkjunum þar sem hann spilar næstu árin. Davidson er þekktastur fyrir að hafa alið af sér næst besta leikmann NBA-deildarinnar þessa dagana, Stephen Curry.