Hætta olíuleit við Færeyjar

Olíuleit hefur verið hætt við Færeyjar, að minnsta kosti í bili, eftir að síðasta olíufélagið skilaði inn leitarleyfi sínu í síðustu viku. Færeysk stjórnvöld áforma nýtt olíuleitarútboð á næsta ári. 

Við sögðum frá rannsóknarskipinu Harrier Explorer í Reykjavík um síðustu helgi en það er nú komið á íslenska Drekasvæðið norðaustur af landinu að leita vísbendinga um olíu. En á sama tíma og olíuleitin er að fara af stað í lögsögu Íslands má búast við að rólegt verði á næstunni í olíuþjónustumiðstöð Færeyinga í bænum Rúnavík.

Frá Færeyjum berast þær fréttir að ráðamenn danska olíufélagsins Dong hafi í síðustu viku skilað inn sérleyfi sínu. Samkvæmt færeyskum fjölmiðlum báru þeir meðal annars við lágu olíuverði og mikilli óvissu og áhættu. Þar með hefur það gerst í fyrsta sinn í sextán ára olíuleitarsögu Færeyja að ekkert félag er lengur með virkt leyfi í lögsögu eyjanna. 

Færeysk stjórnvöld hafa frá árinu 2000 gefið út alls 19 sérleyfi en þeim hefur nú öllum verið skilað inn. Á þessum tíma hafa verið boraðar samtals níu holur en mest voru umsvifin fyrir tveimur árum þegar Statoil og ExxonMobil stóðu fyrir því að bora tvær holur sem talið er að hafi kostað yfir fjörutíu milljarða króna. 

Hvorug holan skilaði tilætluðum árangri og í framhaldinu hættu olíurisarnir frekari leit. Þó hefur fengist staðfest að olía er við Færeyjar þótt hún hafi til þessa ekki fundist í nægilegu magni til að standa undir vinnslu.

Færeysk stjórnvöld hafa hins vegar ekki lagt árar í bát. Þau hafa boðað nýtt olíuleitarútboð á næsta ári, sem yrði hið fjórða í röðinni í lögsögu Færeyja.